Kazu Wesusu-Wedauberek Polisia Detein Suspeitu Nain 9, Entrega Aan 2; Situasaun Normal Ona

Juventude Wedauberek-Wesusu Munisipiu Manufahi Alas ataka malu, rezulta ema nain 5 kanek, joven nain 4 no katuas ida kanek inklui uma sasan komunidade hetan estragus hanesan sunu no harahun. (Foto: STL/Guilhermina Franco)

ALAS, STLNEWS.co – Kazu ataka malu entre juventude Wesusu ho Wedauberek Postu Administrativu Alas Munisipiu Manufahi, Polisia ho F-FDTL kaptura suspeitu nain 9 no nain 2 ba entega aan rasik, i kazu nee kronolojia mai husi provoka malu husi gas motor. Maibe oras nee dadaun situasaun normal hikas ona.

Haktuir Joni Viana das Regras Superintendente Polisia Komandante Munisipiu Manufahi katak, kronolojia akontesementu husi kazu nee, akontese iha Sesta-feira dia 01 janeiru 2021, oras tuku 3 madrugda, akontese kazu asaltu malu entre joventude ho juventude Umaferik suku Umaberloik, no juventude Wedauberek suku Mahaquidan munisipiu Manufahi.

Insidente nee mosu tanba joventude sira husi Wedauberek uza motor ho kanu resin no gas makas hodi halai ba mai hodi perturba ordem publiku ka moris hakmatek iha bairu Umaferik, hodi nunee joven nain 2 husi aldeia Umaferik sente lasatisfaz ho atitude gas motor nee joventude husi aldeia Umaferik sai mai hein iha estrada hodi fo para, maibe sira lapara no kontinua gas motor ho kanu resin no provoka.

“Husi asaun gas motor nee halo juventude sira husi parte 2 larona malu no laintenede malu diak ona hamosu dezentendimentu, entaun ikus mai juventude sira nee asalta malu ka baku malu hodi rezulta joven nain 4 husi Wedauberek nian hetan kanek kmaan no katuas ida husi Wesusu hetan kanek kmaan. Kontinuasaun husi insidente ida nee mak rezulta familia uma kain 6 hetan estragas 2 mak grave tanba sasan uma laran laaproveita, inklui kios ida hetan sunu, motor 7 hetan tuda ida hetan sunu motuk, motor 7 nee 4 husi Wesusu, no 3 husi Wedauberek”, informa Joni ba STL via telefone Domingo lokraik (03/01/2021).

Nia haktuir, depois de ida nee atuasaun polisia, komandu husi munisipiu Manufahi fo ordem ba komandante esquadra polisia Alas hodi fo asistensia imediata iha fatin akontesementu no mos hetan apoiu komandu polisia minisipiu Manufahi inklui mos hetan asistensia husi F-FDTL postu naval Betanu, iha ekipa konjunta nee halo intervensaun imediatamente hodi kaptura suspeitu no fo protesaun ba vitima sira inklui sasan sira neebe hetan estragus neebe sai hanesan evidensia ba kazu refere.

Iha akontesementu nee larezulta ema ida mate, maibe suspeitu sira ekipa konjunta kaptura kedas i balu mai entrega aan rasik iha polisia hodi prosesu ba investigasaun i aumezmu tempu enkamina ba Ministeriu Publiku atu haree.

Situasaun seguransa iha fatin akontesementu fila hikas ba normal no komunidade sira halai atividade normal hanesan bain-bain.

“Suspeitu neebe kaptura nain 9, no neebe entrega aan nain 2, i balu neebe seidauk kaptura seguransa sei nafatin kontinua buka, maibe sira mos koopera diak tebes ho seguransa, sira neebe mak kaptura nee husi parte rua nee hotu, neebe agora iha hela prosesu investigasaun no Segunda-feira lori ba iha prokurador Suai hodi halao julgamentu ba primeiru interogatoriu”, tenik nia.

Depois de nee atuasaun normaliza kedas iha area refere, no komunidade sira halao atividade normal. Kona ba komunidade sira neebe mak konsege halai sai husi sira nia uma ida nee atu dehan katak situasaun emjeral lao normal no uma sasan neebe hetan estragus sei aguarda hanesan evidensia.*

Reportajen: Guilhermina Franco
Editor: Ekipa STL

LEAVE A REPLY

Please enter your comment!
Please enter your name here