Kondenadu BS Hetan Liberdade Kondisional

Kondenadu inisial BS ho idade 88 hetan liberdade kondisional husi tribunal, tanba kumpre ona kastigu metade de pena. (Foto: STL/Terezinha de Deus)

DILI, STLNEWS.co – Kondenadu inisial BS ho idade 88 hetan liberdade kondisional husi tribunal, tanba kumpre ona kastigu metade de pena.

“Ohin tribunal marka audisaun ba rekuju ida naran BS hetan kondenasaun husi Tribunal Disrital Baucau iha tinan 2018 ba pena neebe mak tinan walu,” dehan defeza arguidu nian, Jose Maria da Costa Guterres ba STL, iha TDD, Kuarta (24/03/2021).

Nia hatutan, kondenadu hetan tiha indultu husi Prezidente da Republika iha tinan kotuk iha fulan Augustu 2020, neebe hamenus tinan ka indultu parsial hetan fali tinan hitu, nia metade de pena monu fali iha 21 Marsu 2021.

Nunee agora nia livre ona ema neebe idoju ho idade 88 ba leten, iha direitu atu sai tuir lei ezekusaun penal nian lei 14/2014. No krime neebe kondenadu komete, nia kastigu nee husi tinan lima, too iha tinan sanulu resin lima.

Kondenadu kumpre ona metade de pena, ho razaun katak indultu parsial neebe mak Prezidente da Republika dekreta ona iha tinan kotuk.

Tanba nee hanesan defeza, aseita ho liberdade kondisional nee, tanba kondenadu kumpre ona saida mak dehan iha lei, no segundu kestaun umanidade nia kondisaun idade ona, tanba nee tenke husik nia hetan liberdade nee.

Iha fatin hanesan, Diretor Prizaun Becora, João Domingos dehan, kondenadu vulneravel ona, tanba nee merese hodi hetan liberdade kondisional.

“Ita nia avo nee liberdade imediata, tribunal rona ita nia deklarasaun tuir asaun penal katak, ita nia pai vulneravel tebes, atinje ona metade de pena,” dehan João.

Nia hatutan, kulpa neebe kondenadu hetan nia halao ona, nee hatudu katak lei nee vale hotu ba ema kiak riku, beik, labarik hotu hotu tenke sujeita ba lei, ho ida nee mak kulpa neebe nia halo, sai ona responsabilidade ba nia pena, no hetan pena tinan ualu.

Tanba nee iha tinan 2020 hare katak nia vulneravel tebes, tanba nee hamutuk ho ekipa prizaun nian ho hanoin ida katak, nia merese duni aprezenta ba Prezidente da Republika atu husu indultu.*

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here