Krime Violensia Domestika, Tama TDD 284

Iha fulan Janeiru too Setembru tinan nee, krime violensia domestika natureza semi publiku no publiku, tama iha Tribunal Distrital Dili hamutuk 284. (Foto: Help Guide)

DILI, STLNEWS.co – Iha fulan Janeiru too Setembru tinan nee, krime violensia domestika natureza semi publiku no publiku, tama iha Tribunal Distrital Dili hamutuk 284.

Juiz Administrador Tribunal Distrital Dili, Afonso Carmona hatete, krime neebe tama iha Tribunal Distrital Dili barak liu mak krime violensia domestika.

“Husi Janeiru to mai agora fulan Setembru nee krime violensia domestika neebe tama iha Tribunal Distrital Dili maka 284, kona ba hira maka halo ona nia desizaun ita seidauk deside, sei hein relatoriu ikus husi fulan nee,” dehan Juiz nee ba STL, iha nia knaar fatin TDD, Sesta (25/09/2020).

Kazu violensia domestika tuir nia katak iha juiz nain sanulu maka kaer prosesu sira nee no iha ofisial da justisa hamutuk nain rua nulu resin haat, kada juiz ida iha ofisial nain rua.

Tanba nee atu halo redusaun ba krime sira nee, dala ruma realiza julgamentu iha tribunal bolu ema la mai, tanba hela dook no transporte la iha maka tribunal iha planu no realiza ona julgamentu movel.

“Julgamentu movel nee sei halao kontinua too iha fulan Dezembru, hodi hare iha redusaun ba krime neebe tama ka lae, se la iha redusaun maka tinan neebe sei mai, hetan apoiu husi UNDP atu hare mos ba julgamentu ne,” nia esplika.

Carmo esplika krime violensia domestika neebe akontese ho numeru aas, balu mai ho forma ofensa simples balu ho violasaun seksual, no maus tratus, maibe barak liu maka ofensa simples neebe nia natureza semi publiku.*

Reportajen: Terezinha De Deus
Editora: Carme Ximenes

LEAVE A REPLY

Please enter your comment!
Please enter your name here