Laen-Fen Fahe Malu

Lezada ho inisial AG (Fen), deside fahe malu ho arguidu inisial DX (Laen), tanba ninia laen baku nia. (Foto Ilustrasaun: Espesial)

DILI, STLNEWS.co – Lezada ho inisial AG (Fen), deside fahe malu ho arguidu inisial DX (Laen), tanba ninia laen baku nia.

Tuir faktus katak, iha loron 17 fulan Julho tinan 2020 iha arguidu no lezada nia uma Becora, lezada foin fila husi serbisu. Lezada iha hela kuartu laran no kaer hela telefone, arguidu tama liu ba hodi simu tiha telefone husi lezada, hodi baku kedan lezada hanesan tuku iha kabas, tuku iha liman.

Maski lezada hases an sai mai iha liur, maibe arguidu kontinua tuir sai mai hodi baku lezada.

Hahalok arguidu nian nee, halo lezada sente moras, hodi ba keixa iha polisia.

Tanba nee, Ministeriu Publiku akuza arguidu ba iha krime violensia domestika, ho forma ofensa integridade fisika simples neebe previstu iha artigu 145 husi kodigu penal.

Hatan ba faktus nee, iha audensia julgamentu laran, arguidu hili nia direitu silensiu ka nonok ba faktus neebe dun ba nia.

Lezada haforsa tan akuzasaun nee katak, arguidu ema neebe violentu, problema kiik oan ida, nia liman sempre kona lezada.

“Arguidu mane neebe problema kiik ida nia liman sempre kona hau, tanba nee iha ida kalan nee, hau tahan labele ona, tanba nee hau halai ba kesar iha polisia, deklara lezada iha sala julgamentu, Tersa (26/01/2021).

Lezada deklara tan, agora nia perdua arguidu nia hahalok ona, maibe nia la simu tan arguidu hanesan nia laen, tanba nia deside fahe malu ona, ida idak lao ninian.

Lezada dehan tan, la taka dalan ba arguidu atu ba hare sira nian oan, maibe se arguidu la hare, lezada mos la obriga arguidu ida, tanba sira nia oan agora hela ho lezada nia inan aman iha foho.

Rona tiha deklarasaun husi lezada no arguidu, Tribunal husu ba iha Ministeriu Publiku atu tama ba iha alegasaun.

Liu husi alegasaun, husi parte ministeriu publiku nian, husu ba tribunal atu aplika pena prizaun fulan sia suspende ba tinan ida.

Enkuantu husi parte defeza nian, husu ba tribunal atu aplika pena neebe adekuadu ba arguidu.

Rona tiha parte rua, tribunal adia hikas ba loron seluk hodi rona leitura sentensa.

Audensia julgamentu nee prezide husi juiz singular Ivan Suritai, Ministeriu Publiku reprezenta husi prokurador Hernani Rangel, arguidu hetan asistensia legal husi defensor publiku Rui Guterres.*

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here