LS Komete Krime Hasoru Eis Prezidente CNE

DILI, STLNEWS.co – Tribunal Distrital Dili (TDD) iha loron Segunda nee (08/11/2021) halao julgamentu ba arguidu ho inisial LS, neebe komete krime Denunsia Kalonioza hasoru eis Prezidente Komisaun Nasional Eleisaun (CNE – sigla Portugues), AAB.

Tuir faktus katak, lezadu AAB nuudar Prezidente CNE, no arguidu LS nuudar funsionariu publiku, la iha relasaun familia no la konhese malu.

Iha loron neebe haluha ona, maibe iha fulan Marsu tinan 2020 oras tuku 10:00 OTL iha lezadu nia servisu fatin, lezadu loke media sosial Facebook haree hetan kedan arguidu tau komentariu iha nia pajina facebook katak, lezadu nuudar Prezidente CNE halo komentariu iha kanal televizaun nasional ida la iha imparsialidade, tanba lezadu mak fo influensia ba PR atu konvese partidu CNRT hodi forma koligasaun.

Arguidu mos alega katak, lezadu mak indika kompania hodi sosa billete aviaun hodi halo viajen, nomos halo manutensaun ba kareta, hahalok lezadu nian nee la liu husi prosedimentu legal, maibe iha indikasaun familiarizmu.

Konsekuensia husi arguidu nia komentariu nee, bele halo lezadu hasoru prosedimentu kriminal. Motivasaun husi arguidu nia hahalok nee, lezadu la hatene.

Tanba nee Ministeriu Publiku akuza arguidu ba krime Denunsia Kalonioza neebe previstu iha artigu 285 husi Kodigu Penal.

Hatan ba faktus nee arguidu deklara, nia mak hakerek duni komentariu nee ba lezadu, tanba nia la aseita lezadu nia komentariu antes nee, neebe dehan arguidu mestradu ka doutoramentu.

Tribunal husu ba arguidu buat neebe hakerek iha faktus ka akuzasaun, se iha prova bele hatama, maibe arguidu deklara la iha prova maibe arguidu mak hakerek deit.

Rona tiha parte rua, tribunal adia fila fali ba loron 23 fulan Novembru oras tuku 11:00 OTL hodi rona desizaun.

Audensia julgamentu nee, prezide husi Juiz Singular Ivan Suritai, Ministeriu Publiku reprezenta husi Prokuradora Bemvinda do Rosario, no arguidu hetan asistensia legal husi Defensor Publiku, Joao de Carvalho.

(ter)

LEAVE A REPLY

Please enter your comment!
Please enter your name here

NEWS UPDATE

Xanana Fila Hikas Ona Mai TL Ho Batik

DILI, STLNEWS.co - Hafoin halao viajen ba Japaun ho Portugal, durante semana 3 hodi halao enkontru lubuk ida, no simu honorariu doctorate 2 husi...

Jornalista Iha Filipina Hetan Tiru, Suspeitu Sei Misteriu

DILI, STLNEWS.co – Jornalista ida mate hetan tiru iha Filipina loron Kuarta horiseik (08/12/2022), bazeia ba informasaun husi grupu advokasia fatin neeba. Nia mak Jesus...

Universidade Katolika TL Iha Lasu No Devosaun Boot

DILI, STLNEWS.co – Ohin governu no lider Igreja Katolika hamutuk ho Premeadu Nobel da Paz, Dr. Jose Ramos Horta halo inagurasaun abertura solene Universidade...