Membru Polisia Hetan Baku Uluk Husi Vendedor

Segundo Komandante Polisia Munisipiu Dili, Superintendente Asistente Polisia Euclides Belo. (Foto: STL/Claudios de Jesus)

DILI, STLNEWS.co – Segundo Komandante Polisia Munisipiu Dili, Superintendente Asistente Polisia Euclides Belo, responde ba deklarasaun husi deputados iha Parlamentu Nasioal loron hirak liuba, kona ba membru polisia halo agresaun fiziku hasoru komunidade (vendedor), tanba membru polisia nee hetan baku uluk no kanek iha parte liman nian, ikus membru halo auto defeza ba nia an.

Nia dehan, bazeia ba relatoriu neebe maka PNTL Munisipiu Dili iha, katak PNTL laos naran ba halo atuasaun krimi.

“Bainhira PNTL halo akompaniamentu ba jestaun de merkadu iha Munisipiu Dili, hodi garante dekretu lei higeinu no mos orden publika, implementa lei nee hodi kontrola ba sistema merkadu Munisipiu Dili nian.” esplika nia.

Nia hatutan iha loron 6 de Fevereiru iha tuku 6 loraik ba leten ekipa sistema merkadu neebe maka hetan apoio husi komando Munisipiu Dili ho forsa rejerva ba iha tereinu, hodi halo disiplinalizasaun ba vendedores sira neebe maka faan sasan iha estrada laran no mos faan iha trotoar leten, tanba bele implika mos ba iha movimentu ema seluk nian.

Nia esplika katak, bainhira polisia ba halo kontrolu, ho nunee mosu mos asaun krimi ida entre komunidade iha ida ka rua mak la kumpri no ikus mai mosu problema hasoru polisia.

’’Tanba nee maka ami nia membru polisia nee hetan baku uluk uza kapasete inklui mos iha save motor iha tudik kikoan neebe maka tara hamutuk ho save nee kona membru nia liman, ikus mai ita nia membru polisia nee halo auto defeza ba niaan hodi bele normaliza situasaun.’’

Nia afirma katak, komunidade neebe maka halo asaun hasoru membru polisia nee ate agora seidauk halo keisa ba iha esquadra.

Iha akontesementu nee membru polisia hetan kanek iha parte liman nian tamba, membru polisia nee halo auto defeza ba nia an.

‘’Portantu ida nee maka akontese, no fotografia neebe maka iha, nee fotografia membru neebe maka hetan kanek, no informasaun nee sei hatoo ba iha Komando Jeral hodi bele iha konesementu atu hatoo ba ministru, atu nunee parte relevante bele hatene katak, asaun de polisia nee hodi garante siguransa ba iha komunidade’’

Aleinde nee, Segundu Komandante Polisia nee hatoo ba iha komunidade sira atu bele kolabora ho atendementu husi parte siguransa nian, laos halo fali asaun hasoru polisia

Se kuandu sira halo atuasaun neebe maka fora husi regras, tamba komando polisia no esquadra polisia iha atu komunidade ka sidadaun ida bele halo keisa ba asaun hirak nee.

‘’Agora ami halo ona konfirmasaun ba iha esquadra Dom Aleixo, neebe maka toma konta ba juridisaun prosesu kriminal neebe maka toma konta ba knaar polisia nian, no keisa nee seidauk halo promosaun, alende nee mos komando Polisia Munisipiu Dili, ami seidauk simu keisa formal ba validasaun prosesu nee’’

Euclides mos husu ba komunidade hotu atu bele kolabora ho parte polisia, no labele halo asaun hasoru, tamba polisia laos forma husi robot, tamba polisia mos hanesan ema ida hodi servi ba nia ema.

Reportajen: Claudios de Jesus
Editor: Ekipa STL

LEAVE A REPLY

Please enter your comment!
Please enter your name here