Polisia Halo Indentifikasaun Ba Joven Nain Hitu

Komandante PNTL Munisipiu Dili Superintendente Xefi, Henrique da Costa. (Foto: STL/Efizenia da Costa)

DILI, STLNEWS.co – Komandu Polisia Nasional Timor-Leste (PNTL), liu husi Komandu Munisipiu Dili halo ona indentifikasaun ba joven nain hitu (7), neebe diskomfia envolve iha kazu asaltu malu iha area Eskola SD Tingkat, Suku Bebonuk, Postu Administrativu Don Aleixo, Munisipiu Dili.

Komandante PNTL Munisipiu Dili Superintendente Xefi, Henrique da Costa hatete, kazu konfrontu entre joven sira iha suku Bebonuk Polisia bolu ona joven nain hitu halo identifikasaun durante 12 oras tempu.

“Ami la detein joven sira, maibe mai bolu ona joven nain hitu halo identifikasaun deit, depois ami hosik fali sira ida ida fila uma, tanba agora dadaun situasaun lao diak no hakmatek,” dehan Henrique ba Jonalista sira, iha komandu PNTL Caicoli, Dili (26/01/2021).

Enkuantu kona ba informasun neebe publika iha media sosial katak iha joven deskunesidu balun neebe mak impede ema nian movimentu iha area Bebonuk, liu husi baku, sona, no hana ho rama ambon, komandu PNTL munisipiu Dili konsidera hanesan ajeitasaun ida, nunee husu ba komunidade labele fiar informasaun sira neebe falsu.

Maski Timor-Leste iha hela estadu emerjensia, maibe la bandu sidadaun sira nian movimentu, biar nunee komandu PNTL munisipiu Dili sei garante siguransa iha munisipiu Dili durante oras 24 nune’e bele seguru ba ema hotu.

“Ekipa konjunta kompostu husi komandu PNTL Dili, Unidade Espesial Polisia (UEP), Sentru formasaun polisia akademia Comoro, Komandu Jeral PNTL, Unidade Polisia Froteira (UPF), Unidade Polisia Maritima (UPM), ita loron no kalan halo indentifikasaun hela ba fatin sira neebe mak risku no sai potensia ba ameasa konflitus, ita kontinua patroillamentu, tanba laiha sidadaun ida atu limete ba ema seluk nia movimentu,” dehan nia.

Iha fatin ketak, Xefe suku Bebonuk Serafin Machado hatete, kazu konfrontu iha eskola SD Tingkat suku Bebonuk nee joven husi aldeia Metin 4 ho Metin 1 mak provoka malu hodi baku malu rezulta balu kanek, inklui estraga motorizada balun.

“Kazu joven sira asaltu tuda malu iha eskola SD Tingkat, tanba individu, maibe problema akontese tiha joven sira lori fali grupu ho grupu mak hodi provoka malu hodi asaltu tuda malu hodi rezulta joven balun kanek, inklui motorizada balun sira baku rahun,” dehan nia liu husi telefone.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here