PR Preokupa Ho Krime Organizadu

Prezidente Republika (PR), Francisco Guterres Lú Olo (Foto: Media PR)

DILI, STLNEWS.co – Prezidente Republika Francisco Guterres Lú Olo, preokupa ho krime organizadu liu liu kona ba falsifikasaun dokomentu neebe halo husi veteranus balun.

Preokupasaun nee Xefe Estadu hatoo lui husi Prokurador Geral Republika, Jose da Costa Ximenes ba jornalista, bainhira remata hasoru malu ho Prezidente Republika, iha Palasiu Prezidente Nicolau Lobato, Bairru Pite, Dili, Segunda (19/102020).

“Prezidente Republika preokupa tebes liu liu ho krime organizadu sira hanesan ohin hau temi kontra bandu, mais liu liu ba falsifikasaun dokumentus neebe akontese iha Komisaun Omenajen nomos membru veteranus balun neebe involve,” dehan PGR nee.

Prezidente Republika mos hatoo mensajen katak, Ministeriu Publiku kontinua atua nafatin no PR laran triste, tanba veteranus sira luta 24 libertasaun nasaun no patria, maibe ikus involve aan fali ba falsifikasaun dokumentus.

“Mensajen ba Ministeriu Publiku para kontinua asume nia knaar no responsablidade imparsial no indepedensia, kualker sidadaun hakruuk ba justisa no hakruuk ba lei,” nia esplika.

PGR hatutan iha semana kotuk Tribunal Distrital Dili deside ona pena ba arguidu neebe involve iha kazu droga neebe kaer iha 14 Janeiru 2020. Pena nee kamaan tebes ba droga ho 3 kilograma pontu dozentus ciquenta e tres.

“Saida mak ami halo rekursu hatama ona ba Tribunal Rekursu no ba Tribunal Distrital Dili para kontinua ba Tribunal Rekursu, buat neebe ami preokupa mak juis neebe prezide julgamentu ida nee foin tama kareira seidauk tama tinan ida, se uluk kazu kilogram ida deit ba prizaun tinan 10 agora 3 kilograma ba prizaun tinan 5 deit,” katak nia.

Jose afirma ema uza Timor Leste sai fatin tranzitu, tanba sistema kontrola frazil no segundu mak kuadru legal no terseiru, tanba pena neebe kiik entanu loke tan odamatan para lori droga mai rai laran.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here