SIK Detein CEO Telemor no CEO Elite Computer

Komandu Polisia Nasional Timor-Leste (PNTL) liu husi Servisu Investigasaun Kriminal (SIK), ezekuta mandadu buska no deteinsaun no aprensaun ba sasan evidensia ba CEO ka Diretor Jeral Kompania Telekomunikasaun Telemor ho inisial TVB no Diretor Kompania Elite Computer ho inisial DP. (Foto: STL/Efizenia da Costa)

DILI, STLNEWS.co – Komandu Polisia Nasional Timor-Leste (PNTL) liu husi Servisu Investigasaun Kriminal (SIK), ezekuta mandadu buska no deteinsaun no aprensaun ba sasan evidensia ba CEO ka Diretor Jeral Kompania Telekomunikasaun Telemor ho inisial TVB no Diretor Kompania Elite Computer ho inisial DP.

Suspeitu nain rua SIK detein tuir daspasu Tribunal Distrital Dili (TDD) ho NUK 0166/20/PSIC hodi halo mos primeiru julgamentu iha Tribunal Dili.

Suspeitu CEO Kompania Telemor TVB, SIK halo detein iha ninia servisu fatin Telemor, Timor Plaza CBD 4, andar tolu iha oras tuku 15:00.

Hafoin halo tiha deteinsaun, ekipa SIK halo kedas esplikasaun ba kontiudu karta deteinsaun husi Tribunal nian ba suspeitu no ekipa funsionariu tomak, inklui halo investigasaun ba sistema ka data center no sitema Call Center Telemor nian iha andar rua CBD-2.

Entretantu, suspeitu DP Diretor Kompania Elite Computer, SIK halo deteinsaun iha ninia servisu fatin Colmera Dili, iha oras 14:45.

Hafoin halo tiha deteinsaun, ekipa SIK hamutuk ho ekipa Information Technology (IT) halo aprensaun hodi husu password kontrolu ba sistema data center neebe deskunfia durante kompania Elite Computer utiliza hodi halo koneksaun sistema rede satelite ilegal husi Atambua-Indonezia nian.

Ezekuasaun mandadu buska deteinsaun halao direita husi Komandante Servisu Investigasaun Kriminal (SIK), Superintendente Xefe, José Maria Neto Moc akompañia husi ekipa investigador SIK no hetan apoiu husi Servisu Informasaun Polisia (SIP).

Suspeitu nain rua, TVB no DP deskonfia halo korelasaun servisu ba malu hodi fasilita utiliza internet ilegal neebe uza satelite Indonezia nian ho kapasidade 600 mbps (mega byte per second), neebe fasilita ba lina ministeriu sira inklui Komandu Polisia Nasional Timor-Leste (PNTL).

Impaktu husi servisu korelasaun entre suspeitu nain rua hodi fasilita servisu internet ilegal neebe Servisu Investigasaun Kriminal deteta hahu kedas husi tinan 2012 mai too tinan 2018 fo prezuiju ba estadu Timor-Leste lakon osan barak.

Ho hahalok suspeitu nain rua nee, Ministeriu Publiku akuza suspeitu rua komete kazu burla informatika no kazu fraude fiskal.

Entretantu durante nee Kompania Elite Computer maka manan konkursu halo koneksaun internet ilegal hodi halo korelasaun servisu ho suspeitu TVB, maibe parte Governu Timor-Leste liu husi Autoridade Nasional Komunikasaun (ANC) neebe hetan fasilidade previleziu husi estadu Timor-Leste la halo kontrolu ba servisu kompania rua neebe fo prejuizu ba estadu Timor-Leste.

Tuir dadus neebe STL mos rekolla, durante kompañia Elite Computer servisu hamutuk ho Komandu Jeral PNTL, hodi halo ligasaun internet koneksaun ba sistema kontrolu Closed Circuit Television (CCTV) iha sidade Dili no postu integradu lina fronteira terrestre.

Reportajen: Efizenia da Costa
Editor: Ekipa STL

LEAVE A REPLY

Please enter your comment!
Please enter your name here