Tama Ilegal, PNTL Kaptura FA

DILI, STLNEWS.co – Iha loron 28 fulan Janeiru nee? PNTL kaptura sidadaun Timoroan ida, tanba tama ilegalmente husi fronteira hodi ba vizita nia familia iha Munisipiu Covalima.

Portavoz komandu Jeral Polisia Nasional Timor-Leste, Superintendente Xefe Arnaldo Araujo hatoo kestaun nee ba jornalista sira, liu husi konferensia imprensa iha nia knaar fatin Caikoli Dili, Segunda (08/02/2021).

“Iha dia 28 fulan Janeiru nee iha Kinta feira kalan, sidadaun ida ho naran inisial FA tama ilegalmente mai haree ninia inan aman iha Suai-Covalima, no nia mai halo vizita depois ida nee PNTL sira ba lori kedas nia ba intrega iha karatina, depois tama tiha mai iha karatina 14 dias hotu, sei kontinua prosesu durante 72 oras,” dehan nia.

Nia hatutan, agora dadauk PNTL hein hela nia hodi bele submete nia ba iha prosesu investigasaun. ”Tanba ita hatene katak bainhira tama ilegal, agora dadauk ita kriminaliza sira ba iha kazu kriminal,” dehan nia.

Nia dehan, movimentu ilegais nee kada loron sempre kaer ida ou rua, maibe to ohin loron seidauk hetan dadus sira nee.

Agora dadauk ema hotu preokupa tebes ba moras Covid-19 nee, tanba nee atu prevene ema tama sai ilegamente nee komandu hatoo ona ordem ba munisipiu sira hotu, atu bele mantein nafatin iha lina fronteira nomos lina entradas neebe maka ema tama no sai.

Tanba nee agora dadauk halo hela check point ba ema sira nee liuliu haree ba sira nia kartaun rejistu, nunee bele hatene ema nee mai husi munisipiu neebe.

“Nunee bele haree mos ema nia movimentu neebe maka tama sai husi lina fronteira, tanba nee hau husu ba publiku atu labele kontra regras sira neebe iha, tanba iha lina fronteira sira mos ema nafatin tenta tama sai ilegal,” dehan nia.

Arnaldo afirma, situasaun Covid-19 nee nasaun barak mak mate, no nasaun barak mos orgullu mai ita iha TL tanba laiha ema ida mate ba moras ida nee, ida nee hatudu katak ema hotu nia koperasaun diak ba malu, hodi bele livre ba kazu Covid-19 nee rasik.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here