TDD Aplika Prizaun Preventiva Ba Feto No Mane Soe Bebe

Tribunal Distrital Dili, iha loron Kinta (27/08/2020) liu husi despaisu ikus ba iha prosesu primeiru interogatoriu, aplika medida prizaun preventiva ba iha arguidu mane inisial F, no arguida feto inisial ND, tanba deskonfia iha indisus forte soe bebe neebe foin moris. (Photo: Malaysiakini)

DILI, STLNEWS.co – Tribunal Distrital Dili, iha loron Kinta (27/08/2020) liu husi despaisu ikus ba iha prosesu primeiru interogatoriu, aplika medida prizaun preventiva ba iha arguidu mane inisial F, no arguida feto inisial ND, tanba deskonfia iha indisus forte soe bebe neebe foin moris.

Iha despaisu ikus tribunal aplika medida prizaun preventiva ba iha arguidu no arguida, tanba konsidera iha indisus forte ba krime neebe promove husi Ministeriu Publiku.

Krime maka hanesan krime instigasaun, neebe previstu iha artigu 31 husi KP mensiona katak, sei hetan pena hanesan autor ema neebe konvense, diretamente no dolozamente, ema seluk atu pratika krime ida, sarak krime nee ezekuta duni ka nia ezekusaun hahu duni.

Krime Infantisidiu neebe previstu iha artigu 142 husi KP neebe mensiona katak, inan neebe oho nia oan durante partu, ka tuir kedan partu kuandu nia sei iha hela partu nia influensia perturbadora, sei hetan pena prizaun tinan tolu ba leten.

Krime inturupsaun ba gravidez neebe previstu iha artigu 141 husi KP mensiona katak, ema neebe komete krime nee sei hetan kastigu husi tinan rua to walu.

Antes nee, iha alegasaun husi parte Ministeriu Publiku nian, solisita ba iha tribunal atu aplika medida prizaun preventiva ba iha arguidu no arguida.

Enkuantu husi parte defeza nian, solisita ba iha tribunal atu aplika medida aprezentasaun periodika ba iha arguida, no medida termu indentidade rezidensia TIR ba arguidu.

Maibe tribunal tetu, no iha despaisu ikus deside aplika medida prizaun preventiva ba iha arguidu no arguida neebe deskonfia, hanesan nain ba bebe neebe mate ona, tanba iha indisus forte.

Arguidu nain rua nee, depois de despaisu ikus tun lori kedan ba iha prizaun Bekora.
Tuir faktus katak, akontesementu soe bebe nee akontese iha loron 26/08/2020 iha aldeia Terus Nain suku Vila Verde.

Prosesu primeiru interogatoriu nee, prezide husi juiz titular Edite Palmira, Ministeriu Publiku reprezenta husi Prokurador Jasinto Babo, arguidu hetan asistensia legal husi Defensor Publiku Manuel Sarmento no Humberto Soares.

Reportajen: Terezinha de Deus

Editor: Ekipa STL

LEAVE A REPLY

Please enter your comment!
Please enter your name here