TDD Deside Ona Pena Tinan 5 Ba Arguidu Droga Ho Tipu Sabu-Sabu 3.253 Kg

Prokurador Jeral Republika (PJR) Jose da Costa Ximenes. (Foto: STL/Emerenciana Pinto)

DILI, STLNEWS.co – Tribunal Distrital Dili deside ona pena prizaun tinan lima ba arguido hatama droga ho tipu sabu-sabu 3,253 kg.

Informasaun nee hatoo husi Prokurador Jeral Republika (PJR) Jose da Costa Ximenes ba jornalista, bainhira remata hasoru malu PR Lú Olo iha Palasiu Prezidente Bairru Pite, Segunda (19/10/2020) katak Tribunal Distrital Dili (TDD) deside ona pena tinan lima ba arguidu ho inisial CMB neebe autoridade seguransa kaptura iha Aeroportu Internasional Nicolau Lobatu ligadu ho kazu tipu sabu-sabu 3.253 kg.

PJR hatutan TDD deside ona pena tinan 5 ba arguidu neebe envolve iha kazu droga neebe Ministeriu Publiku kaer iha 16 Janeiru 2020 pena ida nee kmaan tebe-tebes ba droga ho 3.253 kg.

“Informa mos ba ita boot sira hotu katak iha semana kotuk Tribunal Distrital Dili deside ona pena tinan 5 ba arguidu neebe envolve iha kazu droga neebe ita kaer iha 16 Janeiru 2020, pena ida nee kmaan tebe-tebes ba droga ho 3.253 kg,” hatete PJR.

MP halo hela rekursu hatama tiha ona ba TDD atu kontinua ba TR tanba MP preokupa uitoan makaas juis sira neebe preside julgamentu ida nee foin tama iha kareira seidauk too tinan ida.

“Saida maka ami halo hela rekursu hatama tiha ona ba Tribunal Distrital Dili atu kontinua ba Tribunal Rekursu, buat neebe ami preokupa uitoan maka juis sira neebe preside julgamentu ida nee foin tama iha kareira seidauk too tinan ida, se iha kazu balun uluk kilograma ida deit ba tinan 10, kilograma tolu ba tinan lima, hau hodi aviza bainhira MP halo destruisaun ba droga 160 toneladas, PJR aviza buat rua.” katak PJR.

PJR hatutan ema uza Timor Leste sai hanesan fatin tranzitu, primeiru tanba sistema kontrollu iha Timor Leste frazil. Segundu, tanba kestaun kuadru legal, terseiru tanba pena neebe kiik hanesan ida nee, pena ida tinan 5 nee atu dehan saida, 3kg ida nee droga puru, sabu-sabu puru, bele multiplika, valor mais US$3 miloens, pena sira hanesan ida nee, atu loke tan odamatan atu droga atu tama tan nafatin.

Jose hatutan desizaun nee tenke fo bainhira hasai desizaun ruma nee tenke haree kona-ba impkatu saida maka MP sei simu, depois desizaun ida nee sai.

Tanba tinan-tinan sempre tama, nee duni responsabilidade sira neebe laiha esperensia nee diak liu kaer violensia domestika sira, invez kaer droga.

“Hau la dehan laiha kapasidade, maibe esperensia seidauk iha, ita sira haree kriminalidade organizadu sira, hau nia prokurador sira neebe kaer, laos ida foin tama nee maka kaer, kestaun jestaun ida nee,” dehan nia.

Iha enkontru nee Prezidente Republika Francisco Gueterres Lú Olo preokupa ho falsifikasaun dokumentu iha Komisaun Omenajen no membru veteranu balun neebe envolve hodi hetan pensaun veteranu no mertire sira nian husi estadu.

Tanba ida nee Prezidente Republika mensajen maka nee Ministeriu Publiku kontinua atua no nia laran triste tanba saida, nusa maka veteranus balun bele depois luta libertasaun partia ba envolve fila fali sasan sira hanesan nee.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here