TDD Kontinua Rona Sasin Kazu ME

DILI, STLNEWS.co – Tribunal Distrital Dili (TDD) iha loron Tersa (27/07/2021), kontinua rona sasin ba kazu Ministeriu Edukasaun (ME), neebe komete husi arguidu nain tolu.

Iha julgamentu kontinuasaun nee, Tribunal kontinua rona sasin PE neebe iha momentu tinan 2009 serbisu iha Ministeriu Edukasaun.

Sasin deklara katak, nia konese arguidu sira maibe la iha relasaun familia, momentu neeba konaba programa projeitu karta edukativa nian, nia mos hola parte hanesan apoiu tekniku.

No projeitu nee nia mos hola parte hodi ba iha Munisipiu Lospalos, Oecuse, Viqueque, no Baucau, ba iha municipiu Oecuse durante semana ida, no osan perdiam nia simu $200, no kada ba municipiu seluk sempre too semana ida no perdiam simu hanesan.

Sasin deklara, durante viajem ba iha municipiu nia la haree arguidu sira, no osan perdiam sira simu husi arguida DFPB antes halao viajen. Rona tiha sasin sira, Tribunal adia ba loron seluk hodi rona sasin seluk.

Tribunal mos rona ona sasin AS hanesan kondutor arguidu nian, iha sala julgamentu laran arguidu deklara katak, momentu nia hanesan kondutor nia maka lori kareta arguidu AS nian, no deslokasaun neebe sira halo relasiona ho serbisu projeitu karta edukativa nian, ba iha munisipiu Manatuto, Liquiça, Oecusse no Ermera.

Sasin deklara, sira ba iha Liquiça no Ermera fila liu maibe ba iha Manatuto toba kalan rua ka tolu, no ba iha Oecuse seidauk too semana kareta aat, entaun arguidu lori fila tiha kareta ba hadia, arguidu maka sei iha neeba.

Sasin rekonese, sira ba municipiu nee kada loron ida simu perdiam $40, no foti kedan osan nee foin aranka ba. No tuir nia konesementu, arguidu sira loron ida bele hetan perdiam $60.

Sasin deklara tan, konaba viajem ba Aileu iha momentu neeba nia moras hela, tanba nee kondutor seluk maka substitui nia fatin, hodi lori kareta tula arguidu ba Aileu. Antes nee arguidu sira presta ona deklarasaun iha tribunal.

Tuir faktus katak, arguidu AS nuudar funsionariu Ministeriu Edukasaun (ME), neebe deskonfia envolve iha kazu administrasaun danoza, hamutuk ho arguida DFPB no IBPA.

Tuir faktus katak, arguidu AS nuudar funsionariu ME, tinan serbisu iha 2013 – 2016 hanesan Diretor Jeral Ensinu Sekundariu no Tekniku Vokasional iha Ministeriu Edukasaun.

Nunee mos arguidu AS hanesan mos koordenador nasional ba projetu karta edukativa nian.

Tanba nee, iha loron 08 fulan Abril, tinan 2014 arguidu AS submete proposta ida ba Diretor Jeral Servisu Kooperativa, hodi husu orsamentu ba realiza atividade ida nee iha munisipiu hotu ho montante US$16.880,00.

Maibe orsamentu viajem neebe apropria ba arguidu AS montante US$ 540.00, maibe arguidu rasik la halo viajem ba munisipiu sira hanesan Munisipiu Likisa iha loron 01/08/2014, no arguidu AS simu tiha osan viajem hamutuk US$ 180.00.

Munisipiu Aileu, iha loron 01/06/2014, arguidu AS mós simu osan ho montante USD $ 120.00. Munisipiu Ermera, iha loron 11/12/2014, arguidu AS simu osan montante US$ 60.00.

Maibe arguidu halao viajem ba Oecusse loron walu deit, tuir lolos nee arguidu AS simu osan viajem montante US$ 440,00, maibe arguidu AS inventa tiha viajem ba loron 10 hodi hetan tan osan ho montante US$ 120.

Hatan ba akuzasaun nee, antes nee arguidu AS mos deklara ba tribunal katak los duni, viajem ba Oecusse nee durasaun loron walu, maibe konaba inventa nee laos tanba nia hakarak, maibe tanba kareta mak at durante loron rua dehan arguidu AS iha sala julgamentu.

“Hau ba Oecusse nee iha loron 22 Setembru too 03 Outubru 2015, maibe hau too Oecusse nee loron tolu deit kareta aat kedas” deklara arguidu.

Audensia Julgamentu nee, prezide husi juiz koletivu Jose Gonçalves, Arjentino Nunes, Alvaro Freitas, Ministeriu Publiku reprezenta husi prokurador Matias Soares, no arguidu hetan asistensia legal husi advogadu privadu no defensor publiku.*

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 21 Setembru: Kazu Pozitivu 67 & Rekuperadu 318

DILI, STLNEWS.co – Sentru Integradu Jestaun Krize (SIJK) ohin relata kazu pozitivu iha ema nain 67 no kazu rekuperadu hamutuk 318. "Kazu detetadu foun neebe relata...

Sai PR Labele Halo Terus Povu

DILI, STLNEWS.co – Tuir lian Komunidade Agostina Soares katak, se mak atu kandidata an ba Prezidente Republika ba tinan 2022-2027, labele halo terus tan povu...

Fundasaun Codiva Haklean Konesementu LGBTI Ba Autoridade Lokal

DILI, STLNEWS.co – Fundasaun Codiva haklean informasaun no konesementu konaba asuntu Lesbian Gay Bisexual Trans Intersex (LGBTI) ba autoridade lokal. Haktuir Diretora Ezekutiva Fundasaun Codiva...
%d bloggers like this: