TR Altera Medida Arguidu Liborio Pereira; Devolve Hikas Passaporte

Iha despaisu ikus ba prosesu primera interogatoriu, Tribunal Distrital dili aplika medida proibisaun de auzensia ba iha arguidu Liborio Pereira, maibe parte defeza halo rekursu, no ikus mai Tribunal Rekursu altera tiha medida nee. (Foto: STL/Terezinha de Deus)

DILI, STLNEWS.co – Iha despaisu ikus ba prosesu primera interogatoriu, Tribunal Distrital dili aplika medida proibisaun de auzensia ba iha arguidu Liborio Pereira, maibe parte defeza halo rekursu, no ikus mai Tribunal Rekursu altera tiha medida nee.

Tuir defeza arguidu nian, Sergio Dias Quintas katak, foin dadaun Tribunal Distrital Dili aplika medida de koasaun proibisaun de auzensia ba asistidu arguidu Liborio Pereira no parte defensor publiku hare medida koasaun nee la adekuada, tanba nee defensor halo rekursu ba iha Tribunal Rekursu.

“Tribunal Rekursu hasai nia despaisu iha loron 21 fulan Janeiru 2021, hodi altera medida koasaun neebe Tribunal aplika,” dehan Sergio ba STL, iha loron Segunda (28/01/2021).

Nia hatutan, husi neeba arguidu inosente no Tribunal Rekursu entende katak, medida koasaun neebe Tribunal aplika nee viola artigu 183 kodigu penal, katak arguidu la envolve krime neebe Ministeriu Publiku promove iha Tribunal Distrital Dili.

Nunee, iha artigu 193 soma hamutuk ho artigu 197, tanba juiz husi Tribunal Distrital Dili la tau kestaun kona ba indisiu forte mas tau deit indisiu.

Kuandu aplika medida koasaun neebe forte tenke hare kestaun nee, se tau deit lia fuan indisiu deit, signifika arguidu la komete krime ruma, se tau indisiu forte foin dehan iha posibilidade boot komete krime nee, ho ida nee tribunal rekursu altera medida koasuan ba arguidu, no nia hanesan ema inosente.

Jurista nee esplika agora Tribunal tenke ordena ba iha Ministeriu Publiku, atu bele fo fila fali pasaporte arguidu nian, no sem envolve medida ruma, tanba nee desizaun tribunal rekursu nian.

Antes nee iha prosesu primera interogatoriu, Ministeriu Publiku promove krime partesipasaun ekonomia e negosiu neebe previstu iha artigu 299 husi kodigu penal, neebe deskonfia relasaun ho edefisiu funsaun publiku.

Rekursu neebe hatama husi defeza ba iha Tribunal Rekursu, resposta husi ministeriu publiku nian, husu Tribunal Rekursu mantein ho medida proibisaun de auzensia, maibe tribunal rekursu altera tiha medida nee.*

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here