Tuda Karreta Vidru Rahun, Arguidu 3 Hatan Tribunal

DILI, STLNEWS – Arguidu nain tolu ho inisial CS, GS, JS tenke hatan iha tribunal, tanba lori fatuk tuda rahun lezada inisial MC nia karreta, neebe para iha estrada ninin.

Tuir faktus neebe lee iha loron 23 fulan Setembru tinan 2021 katak, iha loron 29 fulan Agustu tinan 2020, lezada no familia sira partesipa serimonia prenda iha Bairru Farmoza.

Iha dader madrugada, festa nain fo hatene atu ensera festa ona, tanba nee lezada no nia familia sira atu fila. Lezada lao sai mai tama tiha ba karreta laran, rona fatuk kona kareta tarutu, lezada haree ba vidru rahun hotu ona, no hetan deit arguidu CS nia oin.

Iha momentu neeba, lezada ba kedan iha eskuadra polisia, hodi hato’o keixa.

Konsekuensia husi arguidu sira nia hahalok, halo lezada sente lakon prejuizu, tanba nia karreta vidru rahun tenke ba hadia.

Ho hahalok arguidu sira nian nee, MP akuza arguidu nain tolu ba krime Danu com Violensia.

Iha sala julgamentu laran, arguidu CS deklara katak, sira laos intensaun atu tuda karreta nee, maibe karreta nee para hela iha estrada, sira tuda malu mak kona. No razaun husi tuda malu nee, tanba deit ema baku uluk nia kolega nia alin, depois mak nia alin kontaktu ba sira iha Audian tuun mai hodi tuda malu, tanba momentu neeba sira partisipa hela serimonia ida iha Audian.

Arguidu arepende nia hahalok nee, no promete sei la halo tan hahalok nee iha futuru.

Arguidu GS mos deklara karreta neebe aat, lezada ba hadia no sira mak tau osan hamutuk selu ona. Arguidu mos arepende nia hahalok, promete sei la halo tan hahalok nee iha futuru.

Arguidu JS mos deklara, arepende ba nia hahalok nee, sei la halo tan hahalok nee iha futuru. No agora sira ho lezada diak malu ona.

Rona tiha husi arguidu nain tolu, tanba la iha tan sasin ruma neebe arola mai husi Ministeriu Publiku, mak juiz prosesu husu ba iha prokurador atu tama ba iha alegasaun.

Liu husi alegasaun, husi parte MP nian la iha duvidas, tanba haree katak, arguidu sira konfesa imparsial ba faktus. Tanba nee MP mantein ho akuzasaun neebe iha, husu ba tribunal aplika pena, tetu mos arguidu sira nia deklarasaun.

Enkuantu husi parte defeza, alegasaun husu ba iha MP, atu halo alterasaun kualifikasaun juridika, husi krime Danu com Violensia ba iha Danu Simples.

Rona tiha husi parte rua, tribunal kolektivu deside, adia kazu nee ba iha loron ida fulan Outubru hodi rona leitura akordaun.

Prosesu julgamentu nee, prezide husi juiz kolektivu Ana Paula, Maria Solana, Ivan Suritai, MP reprezenta husi Prokurador Domingos Barreto, arguidu hetan asistensia legal husi Defensor Publiku Juvinal Dias.

Reportajen: Terezinha De Deus

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 20 Outubru: Kazu Foun Hamutuk 16

DILI, STLNEWS.co - Ohin loron Sentru Integradu Jestaun Krize (SIJK) rejistu kazu foun hamutuk 16, iha Dili 14 no munisipiu seluk iha nain 2. "Kazu...

Membru F-FDTL Foun Ida Halai Lakon

DILI, STLNEWS.co - Membru foun FALINTIL Forsa Defeza Timor Leste (F-FDTL) ida ohin halai lakon iha sentru formasaun Metinaro tanba la augenta ho instrusaun...

Maromak La Dukur Ba Nia Ema

DILI, STLNEWS.co - Maromak mak iha kbiit tomak sempre akompanha ema hotu iha tempu saida deit no nunka dukur ba ema, tanba ne'e presiza...