Tuku Fen Nehan Monu, Laen Hetan Pena Prizaun

Arguidu ho inisial PFM hetan pena prizaun fulan nee no suspende tinan ida fulan neen, tanba tuku nia fen ou lezada JG ninia nehan ida monu. (Foto Ilustrasaun: GSE)

DILI, STLNEWS.co – Arguidu ho inisial PFM hetan pena prizaun fulan nee no suspende tinan ida fulan neen, tanba tuku nia fen ou lezada JG ninia nehan ida monu.

Tuir faktus katak, iha loron 03 fulan Abril 2020, iha arguidu sira nia uma iha Madohi arguidu dehan ba lezada, atu selu fali arguidu nia osan ho montante dolar walu, neebe arguidu sosa lampu, maibe lezada hatan katak, loron loron “Hau husu osan o dehan osan la iha.”

Ho nunee mosu diskusaun arguidu lori liman tuku iha lezada nia ulun, tebe iha lezada nia kabas, tuku tan iha ibun halo nehan ida monu ran sai barak, mak lezada halai ba vizinu hodi ba kesar ba polisia.

Tanba nee, MP akuza arguidu ba iha krime violensia domestika ho forma ofensa integridade fisika simples.

Hatan ba faktus nee, arguidu deklara katak, arguidu baku lezada tanba osan.

“Hau baku lezada tanba osan, maibe agora lezada ho labarik ba hela iha foho no lezada lakohi ona hau,” deklara arguidu.

Lezada mos haforsa tan akuzasaun katak, arguidu baku duni lezada tanba osan neebe arguidu sosa lampu, maibe agora lezada deside lakohi arguidu ona.

Rona tiha parte rua, tribunal husu Ministeriu Publiku atu tama ba iha alegasaun, iha alegasaun MP husu ba tribunal atu aplika pena prizaun fulan nee, suspende tinan ida fulan neen.

Enkuantu husi parte defeza, husu atu aplika pena neebe justu.

Rona tiha husi parte rua, tribunal adia ba iha fulan Janeiru, hodi rona leitura sentensa.

Audensia julgamentu nee, prezide husi juiz singular, Evanjelinho Belo, MP reprezenta husi prokurador Hernani Rangel, arguidu hetan asistensia legal husi Defensor Publiku.

Reportajen: Terezinha de Deus
Editora: Carme Ximenes

LEAVE A REPLY

Please enter your comment!
Please enter your name here