Atu Sai Komisariu Tenki Iha Elizibilidade

DILI, STLNEWS.co – Jurista konsidera ema neebe atu hetan knaar hanesan Komisariu Kmisaun Anti Korupsaun (KAK), tenki iha elezibilidade tuir lei neebe iha.

“Hau nia hanoin Komisariu KAK tenki iha elizibilidade konforme tuir lei N. 8/2009 iha artigu 8 numeru 1 dehan katak, komisariu tenki sidadaun Timor oan ida, neebe goza kapasidade tomak no bele hili hosi, Mazistradu Judisial sira, Mazistradu Ministeriu Publiku, Defensor Publiku sira, Advogadu sira, Jurista sira ho Meritu rekonesidu ho esperensia profisional tinan lima ba leten,” dehan Jurista Sergio Dias Quintas ba STL iha Dili, Domingo (11/06/2023).

Nia hatutan, bele mos hili husi ajente polisia neebe iha esperensia profisional servisu nian tinan 5 ba leten, no kandidatu ba komisariu tenki rekonhesidu ninia independensia no imparsialidade neebe ho nivel aas.

Nia esplika, komisariu tenki haruka deklarasaun “Rejistu Interese” tuir preve ona iha artigu 6 too 8. Lei n.7/2007, Julho 25 no lezislasaun komplementar.

Jurista nee afirma, nia hanoin uma vez que lei espresamente koalia konaba independensia no imparsialidade, maibe atu sai Komisariu KAK tenki mos iha espiritu aten barani hodi halo knaar komisariu nian liu-liu iha artigu 7 numeru 2, ida nee mak importante.

Iha fatin ketak, Akademiku UNTL Rafael de Jesus dehan, KAK nia knaar mos importante, tanba nee hili ema neebe iha kapasidade hodi apoiu servisu.

“Hau hanoin KAK nia funsaun importante, tamba nee ita fiar bele nomeia komisariu ida, hodi apoiu servisu instituisaun nian lao ho diak,” dehan nia.

Nia reforsa tan, ohin loron KAK halo hela investigasaun ba prosesu lubuk ida, ho komisariu foun bele halo servisu ho lais hodi konklui prosesu sira nee.

Aleinde nee, Prezidente Asosiasaun Majislatura Judisial Timor Leste, Antonino Gonsalves dehan, atu nomeia komisariu haree mos lei no regra sira neebe iha.

“Hau hanoin iha ona lei balu, tanba nee atu nomeia presiza mos haree ba rekezitu sira nee hotu,” dehan nia.

Maske oras nee komisariu seidauk iha, Antonino fiar katak, governu foun sei tau mos prioridade ba kestaun nee, atu nomeia lalais komisariu ida hodi bele halao knaar, nunee apoiu instituisaun bele funsiona ho diak.

(ter)

LEAVE A REPLY

Please enter your comment!
Please enter your name here