DILI, STLNEWS.co – Tribunal Judisial Primeira Instansia Dili halao julgamentu ba arguidu ARE nudar membru FALINTIL-Forsa Defeza Timor Leste (F-FDTL), neebe halo agresaun hasoru lezadu ACX nudar ajente Polisia Nasional Timor Leste (PNTL).
Julgamentu nee halao iha loron Kuarta nee (12/04/2023), prezide husi juiz Koletivu, Alvaro Maria, Jose Gonsalves, Arjentino Nunes, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Defensor Publiku Manuel Exposto.
Tuir akuzasaun neebe juiz prosesu Jose Gonsalves lee sai katak, iha loron 14 fulan Fevereiru tinan 2018, oras tuku 15:00 ekipa patrolhamentu husi PNTL eskuadra Dom Aleixo Dili, halo pasa revista ba motorizada no kareta iha area Tasi Tolu, baliza entre Likisa ho Dili ho objetivu hodi buka sasan kroat.
Nunee, arguidu ARE mosu ho motorizada marka Jupiter MX, sem numeru matrikula, laiha espelu, husi Diresaun Likisa mai Dili.
Haree ida nee lezadu ACX nudar ajente PNTL haruka lezadu atu para nia motorizada, maibe arguidu rejeita kontinua halai no para dook tiha, besik dalan ba Joao Paulo Segundu nian.
Lezadu hakbesik ba husu save motorizada nian, maibe arguidu lakohi entrega ba lezadu, lezadu koko atu foti save iha arguidu nia liman, maibe arguidu tebe hasoru lezadu dala ida, iha lezadu nia oin parte karuk rezulta moras no bubu.
Tebe tiha lezadu mak arguidu foin koalia dehan nia militar, no arguidu kontaktu kedan nia kolega polisia militar kareta isin rua, too kedas iha fatin no apoveita ida nee arguidu tuku tan lezadu nia rentos dala ida hetan bubu, hafoin arguidu nia maluk sira tuku no tebe lisuk kona iha lezadu nia hirus matan, no halo lezadu monu ba rai hodi dada iis la diak.
No lezadu monu tiha ba rai, arguidu hamutuk ho nia maluk sira sama lisuk lezadu ba rai.
Arguidu ho nia kolega sira halo tiha agresaun, arguidu nia kolega sira mos fila, no arguidu mos ho nia motorizada mai Dili.
Konsekuensia husi arguidu ho nia kolega sira nia hahalok nee, halo lezadu hetan bubu no moras iha rentos, ain parte karuk, moras iha hirus matan, no bubu iha isin lolon tomak neebe kona agresaun hafoin halo tratamentu mediku.
Tanba nee, MP akuza arguidu hanesan autor material ba krimi Obstrusaun ba Autoridade neebe previstu iha artigu 243 husi kodigu penal.
Hatan ba akuzasaun nee, arguidu deklara katak faktus neebe konsta iha akuzasaun balu loos no balu lalos.
Arguidu deklara, momentu neeba arguidu hamutuk ho nia kolega sira tuir hela formasaun iha sentru formasaun Tibar, tanba nee la uza farda ida.
Depois de formasaun remata, arguidu mos konduz motorizada husi Tibar mai Dili, too iha Tasi Tolu arguidu haree motorizada barak mak para duni hela iha tasi ibun.
Arguidu deklara, nia mos haree polisia nain tolu hamrik hela iha estrada ninin, bolu duni arguidu atu para, maibe tanba la rona arguidu kontinua konduz motor, no haree polisia ida hamriik iha oin kaer hela estik hapara, mak arguidu foin hapara.
No hapara tiha, arguidu deklara lezadu nee lori estik baku dala ida iha kapaste nia sorin, tuir mai lori tan estik baku dala ida kona iha lezadu nia kapaste oin, tanba nee mak halo kapasete nia vidru rahun, hodi kona lezadu nia ibun too ran.
Arguidu katak, momentu neeba arguidu nia ibun raan tiha mak lezadu foin hatene katak arguidu nee polisia militar, no lezadu husu deskulpa ba arguidu, dehan sira atu ba rezolve iha eskuadra Dom Aleixo.
Arguidu deklara, laos arguidu mak tebe uluk lezadu, maibe lezadu halo tiha arguidu nia ibun raan mak arguidu foin tebe lezadu.
No konaba se mak kontaktu arguidu nia kolega sira mai, arguidu deklara laos arguidu mak kontaktu ida, momentu neeba derepente arguidu nia kolega sira ho kareta rua too ba, lori tiha arguidu ba tur iha kareta, tanba nee arguidu nia kolega sira baku lezadu, arguidu la haree ida no la hatene ida.
Arguidu rekonhese, momentu neeba arguidu nia motorizada utiliza duni plat maibe sei plastik no espelu laiha duni.
Rona tiha arguidu, tribunal adia ba loron seluk hodi rona fali deklarasaun lezadu nian.
(ter)
