DILI, STLNEWS.co – Tribunal Judisial Primera Instansia Dili halao julgamentu ba arguidu inisial MB hanesan aman, neebe halo krimi hasoru lezadu inisial AS hanesan nia oan rasik.
Julgamentu nee halao iha loron Sexta nee (07/2023), prezide husi juiz singular Maria Solana, Ministeriu Publiku reprezenta husi Prokurador Hernani Ranjel, arguidu hetan asistensia legal husi Defensora Publiku Agustinha de Olivera.
Iha sala julgamentu laran Juiza prosesu Maria Solana lee akuzasaun neebe mai husi Ministeriu Publiku katak, lezadu AS defisiente, iha relasaun ho arguidu hanesan aman no oan, no ekonomikamente depende deit ba arguidu.
Iha loron 14 fulan Marsu tinan 2019, iha Munisipiu Likisa, arguidu uza liman hodi tuku kona lezadu nia kotuk laran, no buti mos lezadu nia kakorok hodi kauza moras.
Motivu tanba deit arguidu la gosta lezadu badiu tun sae, tanba sai husi uma ba halimar la tuir oras.
Konsekuensia husi arguidu nia hahalok nee, halo lezadu senti moras iha kakorok no kotuk laran, neebe halo husi arguidu.
Tanba nee, Ministeriu Publiku akuza arguidu hanesan autor material ba krimi violensia domestika ho forma ofensa integridade fizika simples neebe previstu iha artigu 145 husi Kodigu Penal.
Hatan ba faktus nee, arguidu deklara iha sala julgamentu katak, arguidu baku duni lezadu, tanba lao badiu no lao la tuir oras. Hanesan aman ida deklara katak, momentu neeba baku tiha lezadu, arguidu senti hahalok nee la diak, hodi bolu lezadu no hamaus fali lezadu.
Arguidu rekonhese, lezadu sofre duni moras tilun ladun rona moos, no koalia ladun moos, dala ruma koalia ho lezadu hatudu jestu deit.
Arguidu arepende tebes ba nia hahalok nee, no promete iha sala julgamentu laran katak, ba oin sei la halo tan hahalok nee ba iha lezadu.
Juiza haree katak, arguidu konfesa imparsial ba faktus, tanba nee halo konfirmasaun ba iha lezadu ho jestu, lezadu hatudu katak, arguidu lori duni liman buti iha lezadu nia kakorok.
Rona tiha deklarasaun husi arguidu no lezadu, tribunal husu ba iha Ministeriu Publiku no defeza atu tama ba iha alegasaun.
Iha alegasaun Ministeriu Publiku husu tribunal atu aplika pena multa ba arguidu, enkuantu husi parte defeza arguidu nian husu tribunal atu tetu sirkunstansia hotu, no aplika pena multa tuir kondisaun arguidu nian, tanba oras nee daudaun arguidu hanesan ema agrikultor ida.
Rona tiha alegasaun, tribunal adia hikas prosesu nee ba iha loron seluk hodi rona leitura sentensa.
(ter)
