Buti Feen Nia Kakorok, Laen Pena Suspensaun

DILI, STLNEWS.co – Ministeriu Publiku (MP) iha nia alegasaun ba krimi violensia domestika ho forma ofensa integridade fisika simples, husu tribunal kondena laen baku feen pena suspensaun.

Prosesu ida nee halo husi arguidu hanesan laen ho inisial AG, hasoru lezada ho inisial JSF hanesan feen.

Iha alegasaun iha loron Kinta nee (15/06/2023), Prokuradora Ivonia Guterres deklara, faktus neebe konsta iha akuzasaun provadu hotu, bazeia ba deklarasaun husi arguidu no lezada katak, arguidu lori duni liman buti lezada nia kakorok, tanba nee lezada senti moras.

MP konsidera katak, mantein ho akuzasaun neebe iha, arguidu pratika duni krimi neebe MP akuza ba, tanba nee solisita ba iha tribunal singular atu aplika pena prizaun fulan 6 ba iha arguidu, suspende nia ezekusaun ba tinan 1.

Enkuantu, husi parte Defeza Marsal Mascarinhas katak, arguidu konfesa imparsial ba faktus neebe iha, arguidu mos foin primera vez mai iha tribunal, tanba nee atu evita arguidu nia hahalok nee labele akontese tan iha futuru, defeza husu tribunal atu aplika pena, maibe tetu didiak atu aplika pena neebe justu no adekuadu.

Rona tiha alegasaun husi parte rua, tribunal adia ba loron seluk hodi rona desizaun.

Konsekuensia husi arguidu nia hahalok nee halo lezada senti moras, tanba nee MP akuza arguidu hanesan autor material ba krimi violensia domestika ho forma ofensa integridade fisika simples neebe previstu iha artigu 145 husi Kodigu Penal.

Prosesu ida nee prezidi husi Juiz Afonso Carmona, MP reprezenta husi Prokuradora Ivonia Guterres, arguidu hetan asistensia legal husi Defensor Publiku Marsal Mascarinhas.

(ter)

LEAVE A REPLY

Please enter your comment!
Please enter your name here