DILI, STLNEWS.co – prizaun Bekora oras nee daudaun iha dadur juvenil nain 30, maibe dadur sira nee tau iha bloku ketak separa ho dadur adultu sira.
Tuir Diretor Prizaun Bekora Joao Domingos katak, prizaun Timor Leste nia padraun estandar tebes, harii prizaun iha Timor, Nasoens Unidas mak harii kedan, ita opta kedan lei internasional nian, tanba nee iha prizaun laran dadur sira tau separadu.
“Ita halo separasaun ba kategoria tratamentu, labarik sira juvenil husi idade 21 mai kraik, iha prizaun ida maibe tauk blok ketak-ketak, no agora sira iha 30 mak dadur juvenil,” dehan Domingos ba STL iha Dili, Kuarta nee (16/08/2023).
Nia hatutan, husu atu enkoraja ba iha estadu no governu ida nee halo separasaun tratamentu ba dadur ho diak. Maibe haree mos kondisaun balu ita nia nasaun nee enfrenta hela, maibe neineik sei ba oin.
Reforsa tan, importante mak tekniku prizional sira tenki jere didiak atu labele viola regra neebe iha, no tratamentu ba sira nia direitu nakonu, labele viola dadur sira nia direitu.
Tanba nee, atu harii prizaun ketak ka lae kabe ba iha parte relevante sira, hanesan ema tekniku enkoraja deit estadu ida nee atu halo konstrusaun foun.
Esplika tan, formasaun ba dadur juvenil sira espesifiku liu, sira iha formasaun barak liu adultu sira, formasaun konaba suporta pisikososial, formasaun konaba informatika, soldadura, sira mos frekuenta hela konaba Lingua Portugues nomos Ingles, tanba nee sira nia orariu semana ida nakonu ho formasaun sira.
Nunee, husi formasaun sira nee atu prepara sira muda sira nia hanoin, atu sai husi fatin neeba sira bele halo mudansa ba iha moris.
Iha fatin ketak, Akademiku UNTL Sebastiao Dos Santos dehan, presiza duni kria kondisaun diak ba dadur sira, liu-liu tau sira labele hamutuk.
“Presiza duni kria kondisaun diak ba kondenadu sira, liu-liu sira neebe idade sei kiik, tanba ho hanoin moral menus ikus mai sira halo sala tama prizaun, maibe nafatin kria kondisaun diak ba sira,” dehan nia.
Reforsa tan, se governu iha planu atu kria fatin ketak ba dadur neebe ho idade tinan kiik, ida nee sai hanesan planu diak ida, atu iha tratamentu ba sira ketak muda sira nia hanoin.
Aleinde nee, Ministru Justisa Amandio De Sa Benevides dehan, iha planu sei estabelese sentru formasaun juvenil ida.
“Sei estabelese sentru formasaun ba dadur juvenil sira, no sei hetan apoiu husi parseru sira, tuir planu sei halo iha Tibar,” dehan Ministru Justisa.
Reforsa tan, maski agora seidauk kria fatin ketak ba sira, maibe oras nee daudaun iha prizaun tratamentu ba sira kontinua lao, no formasaun ba sira kontinua.
(ter)
