DILI, STLNEWS.co – Oras nee daudaun iha Defensor Publiku hamutuk nain 34, maibe iha nain 30 deit mak oras nee daudaun halao hela knaar hodi fo asistensia ba kliente sira.
“Ami iha defensor hamutuk 34, maibe hau hanesan Defensor Publiku no Adjunta Defensora Publika, Inspetora, labele kaer prosesu hodi fo asistensia ba kliente sira, Defensor Sergio Hornai foin mai husi KAK, ami seidauk distribui prosesu ba, tanba sei fo apoiu hela ba kolega defensor balu nia prosesu, tanba nee iha defensor nain 30 mak kaer prosesu,” dehan Defensor Publiku Jeral Cansio Xavier ba STL iha Kaikoli, Tersa (29/08/2023).
Nia hatutan, prosesu sira neebe rejista iha Defensor Publiku, distribui hotu ba iha defensor idak-idak nia liman, atu nunee prosesu nee julgamentu iha tribunal sira bele sai defeza ba.
Nia esplika, prosesu tama barak liu, maibe haree ba rekursu umanus seidauk sufisiente, ho esforsu halao servisu nafatin kontinua koloka defensor sira hodi atende prosesu sira neebe rejista ona.
Lei judisiariu fo fatin atu estabelese tan tribunal iha munisipiu sira, tanba nee husu ba Sentru Formasaun atu kontinua prepara formados sira hodi prienxe iha kareira defensor sira nian.
Iha fatin ketak, Diretora Sentru Formasaun, Marcelina Tilman dehan, rekursu umanus la sufisiente duni, maibe sentru formasaun pronto fo formasaun.
“Ami sentru formasaun prontu fo formasaun ba iha kareira defensor no sira seluk tan, maibe haree mos ba planu neebe iha, tanba oras nee daudaun fo hela formasaun ba formados balu seidauk termina, ida nee retama ona foin bele haree fali ba oin,” nia tenik.
Tuir Diretora nee, knaar defensor nian sai mos hanesan knaar importante ida, tanba nee ho formasaun husi sentru formasaun, bele produs formados sira atu bele apoiu servisu iha defensor nian.
(ter)
