DILI, STLNEWS.co – Defensor Publiku halao nia knaar hodi fo asistensia ba ema kbiit laek sira neebe hakarak buka justisa, tanba nee labele husu osan ba kliente sira.
“Defensor Publiku servisu ofisial hanesan funsionariu publiku simu osan husi estadu, iha responsabilidade atu la husu onorariu kualker nia intrevensaun ba ema sira neebe hetan asistensia husi defensoria, ate a data iha persentajen kiik, ami mos halo hela ami nia prosesu disiplinar iha nee,” dehan Defensor Publiku Cancio Xavier ba STL iha Kaikoli, Segunda (28/08/2023).
Nia hatutan, publiku kestiona konaba intervensaun neebe ajende Defensor Publiku sira interven kuandu husu onorariu ba atuasaun sira nee, haruka karta ba iha Defensor atu kanaliza ba iha Inspetora.
Nia esplika, la konsege ba iha defensor bele ba iha entidade sira hanesan CAC, Ministeriu Publiku ka Polisia konaba ida nebee husu osan.
Tanba Defensor Publiku nia estatutu, no nia intervensaun nee laos privadu, tanba nee publiku no entidade sira sente husi atuasaun sira nee la dun seguru, bele lori provas atu bele hadia hahalok sira nee.
Defensor nee dehan tan, hanesan defensor jeral kontinua nafatin atu hare asuntu nee ho didiak, kuandu ema ruma hatoo sira nia preokupasaun sei la tuir regra nebee maka iha, kuandu iha denunsia no reklamasaun ruma konaba onorariu, la tuir koridor legal neebe iha sei kanaliza ba iha entidade relevante Ministeriu Publiku ka CAC hodi halao sira nia knar, iha mos orgaun kolegial atu hare konaba prosesu disiplinar konaba violasaun sira neebe iha.
Iha fatin ketak, Akademiku UNTL Sebastiao Noronha dehan, durante nee ema barak sei kestiona konaba servisu Defensor nian, la dun atende masimu ba iha kliente sira.
“Ema sei kestiona konaba sira nia atendementu neebe iha, tanba nee husu ba oin presija hadia diak liu tan atendementu, atu bele atende ema hotu hanesan,” dehan nia.
Nia afirma tan, durante nee iha prosesu balu atendementu defensor sira nian ho diak, tanba akompana prosesu nee to desizaun, iha desizaun mos sira nafatin akompana parte sira kunadu la simu desizaun sira bele halo fali rekursu.
(ter)
