Defeza Konsidera Kazu Luru Mata La Nesesariu Hatoo Rekursu



DILI, STLNEWS.co – Relasiona ho kazu Luru Mata neebe Tribunal Judisial Primera Instansia Dili hasai despaisu aplika medida prizaun preventiva ba arguidu nain 4, Termo Indentidade Rezidensia (TIR) ba arguidu nain 2 no medida aprezentasaun periodika ba arguidu nain 5, parte defeza la halo rekursu hasoru despaisu nee.

“Nudar Defensor Publiku neebe fo asistensia tekniku juridiku ba arguidu sira iha kazu Luru Mata, rekursu iha kontestu norma prosesual nee la obrigatariu, ba kazu ida nee rekursu la nesesariu,” dehan Defeza Sergio Dias Quintas ba STL iha Tribunal, Tersa nee (16/05/2023).

Defeza nee sublina, iha premeiru interrogatoriu alegasaun husi parte defesa husu hodi promove medida koasaun balu iha altura neeba, tribunal simu pedidu sira nee.

Nunee, ba arguidu sira neebe mak sujeitu ba prizaun preventiva nee, tanba iha indisiu forti sira pratika krimi dolozu, tanba ita hatene katak, iha norma prosesual iha artigu 194 numeru 1 alinha (A) indisiu forti katak, arguidu halo krimi dolozu punivel ho pena prizaun aas liu tinan 3, tanba fundamentu husi artigu referidu mak la nesesariu atu halo rekursu.

Defeza reforsa tan, medida koasaun nee laos desizaun, maibe meius hodi asegura arguidu nia prezensa iha aktu prosesual, prosesu primeiru interogatoriu nee halao iha loron Segunda 15/05/2023 no despaisu sai kedan iha oras tuku 9 kalan, neebe prezide husi juiz turnu Ana Paula, Ministeriu Publiku reprezenta husi Prokurador Ozorio Soares, arguidu sira hetan asistensia legal husi Defensor Publiku Sergio Dias Quintas.

Iha despaisu nee, Juiz aplika prizaun preventiva ba arguidu nain 4 mak hanesan LA tinan 44, FA tinan 20, JS tinan 39, DM tinan 33, lima hetan medida koasaun aprzentasaun periodika maka hanesan, TB tinan 20, ARA tinan 22, CJA tinan 16, AA tinan 18, GSS tinan 19, no nain rua hetan medida TIR mak hanesan HG tinan 33, no MS tinan 30.

Prosesu nee mos Ministeriu Publiku promove krimi tolu ba arguidu sira mak hanesan Arma Branka, omisidiu simples, ofensa korporais grave.

Tuir kronolojia katak, akontesimentu nee iha area Lurumata, Aldeia 03, Suku Fatuhada, Postu Administrativu Dom Aleixo, Munisipiu Dili, iha loron 13 fulan Maiu 2023.

Iha akontesimentu nee, mosu problema no ikus mai konsege matebian Bernadino Ximenes Brites ho idade 20 lakon vida.

(ter)

LEAVE A REPLY

Please enter your comment!
Please enter your name here