DILI, STLNEWS.co – Arguidu ho inisial HSM neebe deskonfia envolve iha kazu omisidiu Elemloi, submete ona ba prosesu primeiru interogatoriu, parte Ministeriu Publiku (MP) husu tribunal atu aplika Prizaun Preventiva.
Prosesu nee halao iha loron Kuarta nee (02/08/2023), prezidi husi Juiz turnu Afonso Carmona, MP reprezenta Prokurador Hernani Rangel, arguidu hetan asistensia legal husi Defensor Publiku Joao de Carvalho.
Prosesu nee taka ba iha publiku, maibe husi parte MP promove arguidu ba iha krimi omisidiu.
Halo tiha indentifikasaun ba arguidu, iha faze alegasaun prokurador husu tribunal atu aplika Prizaun Preventiva ba arguidu.
Rona tiha alegasaun nee, juiz prosesu suspende prosesu nee ba iha loron Kinta aban (03/08/2023), iha tuku 10:00, hodi rona despaisu husi tribunal.
Tuir observasaun STL nian, arguidu lori ba iha tribunal akompanha husi PNTL, hatais ropa detidu. Iha tribunal iha mos familia balu husi arguidu nian, neebe akompanha prosesu nee.
Tuir kronolojia neebe iha, Polisia Nasional Timor-Leste (PNTL) liu husi Ekipa Departementu Investigasaun Kriminal (DIK), Servisu Nasional Intelejensia (SNI), Unidade FALINTIL J2, S2 no N2, ezekuta mandadu detensaun husi tribunal hodi detein suspeitu ida ho insial HSM neebe deskonfia envolve iha kazu omidisiu matebian Isac Sinarai nia vida iha area Elemloi, Delta III, Suku Komoro, Postu Administraivu Dom Aleixo, Munisipiu Dili.
Ekipa konjunta iha loron 31/07/2023 maizumenus tuku 14:14, ezekuta mandadu detensaun ho NUC: 0002/23.PNSIC, hodi detein suspeitu ho insial HSM iha nia rezidensia Maskarinas, Aldeia 04, Suku Maskarinas, Postu Administrativu Vera Kruz, Munisipiu Dili.
(ter)
