DILI, STLNEWS.co – Tribunal Judisial Primeira Instansia Dili liu husi despaisu ikus, aplika medida Aprezentasaun Periodika (AP) ba arguidu nain 6 inisial JG, CJG, NR, RS, ASS neebe deskonfia envolve kazu konfrontu atividade graduasaun PSHT foin lalais nee, iha area Rai-Kotu, Suku Komoro no Kampung Alor.
Ba prosesu ida nee, Ministeriu Publiku promove krimi obstrusaun autoridade neebe previstu iha artigu 253, krimi Danu Agravadu iha artigu 243 Kodigu Penal Timor Leste ba arguidu sira.
Despaisu nee lee sai husi Juiz turnu Alvaro Maria, iha loron Kinta (17/08/2023). Iha despaisu nee, juiz nee desidi aplika medida aprezentasaun periodika ba arguidu nain 6.
Tuir Defeza arguidu nian Jose Guterres katak, tribunal aplika medida aprezentasaun periodika ba arguidu sira.
“Tribunal aplika medida Aprezentasaun Periodika ba arguidu nain 6 atu aprezenta aan iha tribunal fulan ida dala ida,” dehan nia ba jornalista sira iha tribunal.
Nia hatutan, hanesan defeza aseita ho despaisu neebe hatun husi tribunal, no nia parte la halo rekursu tan. No medida neebe tribunal aplika la iha sasin ruma mak haree ho matan konaba envolvimentu arguidu sira nian, tanba nee aplika lai medida nee ba arguidu sira hodi haree ba prosesu investigasaun ba oin.
Defeza nee dehan, atu aplika medida Prizaun Preventiva tenki prienxe rekejitus ruma, maibe ba krimi ida nee la prienxe rekejitus, tribunal aplika deit medida AP hodi asegura prosesu investigasaun.
Iha alegasaun, Ministeriu Publiku Domingos Barreto husu tribunal atu foti medida koasaun ba arguidu sira tuir tribunal nia konviksaun, bazeia promosaun krimi neebe Ministeriu Publiku promove ba arguidu sira.
Parte Defeza Jose Guterres iha alegasaun husu tribunal aplika medida koasaun Termu Indentidade Rezidensia (TIR) ba nia kliente sira.
Tanba tuir defeza nia haree katak laiha kondutu konkreta ida neebe hatudu katak, iha indisius arguidu sira nee envolve duni iha kazu konfrontu nee.
Jose esplika, kuandu tribunal atu aplika Prizaun Preventiva no Aprezentasaun Periodika ba arguidu sira tenki iha konduta juridika ida neebe hatudu iha idisius forti.
Prosesu nee prezidi husi Juiz turnu Alvaro Maria, MP reprezenta husi Prokurador Domingos Barreto, arguidu hetan asistensia legal husi Defensor Publiku no Advogadu Privadu.
(ter)
