DILI, STLNEWS.co – Deskonfia katak Prezidente RAEOA faan komunidade nia rai ba iha eis Prezidente RAEOA, oras nee daudaun parte KAK nian rekolha hela informasaun hodi halo analiza.
Diretor Investigasaun KAK, Jose Verdial ba STL iha Dili, Sesta nee (01/09/2023) hatete, tenki rejista hotu hodi averigua, tanba ba iha indisus krimi korupsaun, labele ho informasaun verbal deit, maibe tenki iha duni provas ruma, presiza halibur dokumentus ruma, halibur informasaun detalhu ruma, atu hatene lo-loos informasaun sira neebe iha publiku, agora ita foin rejista hanesan informasaun.
Nia hatutan, kuandu rejista ona ekipa investigasaun halo hela averiguasaun buka tuir hela informasaun liu husi halibur dokumentus, no halibur informasaun husi informador sira, tanba KAK mos iha informador ida neebe destaka iha Oekusi, halibur hela informasaun husi neeba. Kuandu haree iha indisus ba korupsaun nian, foin bele halo auto partisipasaun ba iha Ministeriu Publiku hodi bele rejista hanesan autus inkeritu.
Iha fatin ketak, Jurista Fernando da Costa dehan, fo kompetensia tomak ba KAK hodi halao sira nia servisu.
“Ita tau fiar ba iha KAK husik sira halao sira nia servisu, karik iha indisus ruma ba krime sira bele indentifika,”dehan Nia.
Jurista konsidera, maske komisariu seidauk iha maibe, fiar katak investigador sira sei halao sira nia funsaun ho diak, atu halo investigasaun klean konaba prekupasaun ida nee, atu hatene loos asaun neebe halo tuir regra ka lae.
Tuir informasaun nebee iha katak, Prezidente Autoridade Rejiaun Administrativu espesal Oe-Cusse Ambeno (RAEOA) Arsenio Paixao Bano, faan tiha komunidade hamutuk uma kain hitu nolu resin neen (76) sira nia rai, inkliu rejidensia Prezidente Autoridade RAEOA iha Area Fulolo, Aldeia Sanane, Suku Costa, sub-rejiaun Pante-Makasar villa, neebe mak iha tinan 2015 guvernu okupa komunidade sira nia rai, hodi harii rejidensia ba eis Prezidente Autoridade RAEOA Mari Alkatiri hodi hela.
Maibe to ikus Prezidente Autoridade RAEOA atual Arsenio Paixao Bano, faan fali rejidensia ho komunidade sira nia rai nee ba iha eis prezidente Autoridade RAEOA Mari Alkatiri, ho total orsamentu US$ 556. 889.04 mil resin, nunee husi komunidade afetadu nain ba rai nee, sira rejeita total ho asaun neebe Prezidente Autoridade RAEOA Arsenio Paixao Bano halo.
(ter)
