DILI, STLNEWS.co – Relasiona ho informasaun neebe espalha deskonfia katak, Prezidente RAEOA faan komunidade nia rai ba iha eis Prezidente RAEOA, oras nee daudaun KAK rejista ona.
Diretor Investigasaun KAK, Jose Verdial hatete, pozisaun KAK nian hafoin simu informasaun konaba ida nee, sira nia parte husi Unidade Informasaun Seguransa halao kedan inisiativa, rejista informasaun neebe iha.
“Baibain rejista hotu ami tenke aberigua, tanba ita hare ba iha indisus krime korupsaun, ita labele ho informasaun verbal deit, maibe ita tenke iha duni provas ruma, presiza halibur dokumentus ruma.
Halibur informasaun detalu ruma, atu hatene lolos informasaun sira neebe iha publiku, agora ita foin rejista hanesan informasaun,” dehan nia ba STL iha Polisia Akademik Komoro, Kuarta (23/08/2023).
Nia hatutan, kuandu rejista ona ekipa investigasaun halo hela abriguasaun buka tuir hela informasaun liu husi halibur dokumentus, no halibur informasaun husi informador sira, tanba KAK mos iha informador ida neebe destaka iha Oecuse, halibur hela informasaun husi neeba. Kuandu hare iha indisus ba korupsaun nian, foin bele halo auto partisipasaun ba iha Ministeriu Publiku hodi bele rejista hanesan autus inkeritu.
Nia esplika, KAK halao nia servisu bazeia deit ba prinspiu objetividade no legalidade atu hare, se nia fan rai maka tama hela iha prosesu legal ruma, tanba nee presija aberiguasaun kualker informasaun neebe iha presija halibur dokumentus hotu hodi hatene nia regra oinsa, no nia implementasaun oinsa.
Iha fatin ketak, Jurista Fernando da Costa dehan, KAK hanesan investigador iha kompetensia atu hare konaba kestaun sira nee.
“KAK sai hanesan parte investigador ida, sira iha komptensia mos atu buka hatene konaba prekupasaun ida nee, atu hare lo-loos ida nee tuir duni regra ka lae,” dehan nia.
Tuir Jurista nee hatete, ohin loron ema hotu iha lei nia okos, tanba nee se deit presija halo tuir no hakruk ba regra neebe iha.
(ter)
