DILI, STLNEWS.co – Servisu Informasaun Polisia Nasional (SIPN) halo buska no identifika autor sira ba krimi publiku, hanesan naok motor, telefone, no sasan neebe durante nee sempre akontese iha kapital Dili, konsege asegura ona joven nain ida (1) ho motor ida (1), tanba deskonfia envolve iha kazu refere.
Hafoin simu orientasaun husi Xefi Servisu Informasaun Polisia (SIP) Nasional, hodi buka tuir no identifika autor sira ba krimi publiku, mak hanesan kazu naok motor, hadau telefone, no naok sasan husi kareta laran neebe mak sempre akontese iha Dili laran, ekipa servisu konsege asegura tan joven nain 1 neebe deskonfia envolve iha kazu naok motor no suspeitu nee naran inisial EFS alias J, tinan 26, hela iha Kampung Baru, Komoro Dili.
Enkuantu tuir informasaun neebe STL asesu husi pajina relasaun publika Ministeriu Interior (MI) Domingu kalan nee (31/07/2022), katak iha loron 29 Julhu tinan 2022 ekipa simu informasaun husi vitima ho naran Oscar Lucio Afonso Soares, hela iha Dili, Suku Vila-Verde, katak nia motor marka Honda Beat ho numeru polisia N. 1403 TLS, ema naok iha area Vila-Verde tinan rua ona, nunee ekipa dezenvolve tan kazu balu husi suspeitu sira neebe kaptura iha semana kotuk konsege identifika suspeitu EFS neebe ligadu ho kazu naok motor nee.
Kontinua ba pajina 2
