DILI, STLNEWS.co – Oras nee daudaun Tribunal Oekusi iha kazu pendente barak liu mak prosesu krimi nian, tanba nee sei esforsu hodi redus kazu sira nee.
“Prosesu pendente husi sivil no prosesu krimi hahu husi fulan Janeiru too mai fulan Junhu nee hamutuk 369,” dehan Juiz Administrador Tribunal Judisial Primera Instansia Oekusi, Arjentino Luiza Nunes ba STL iha Oekusi via telefone, Segunda (17/07/2023).
Nia hatutan, prosesu pendente numeru boot liu mak krimi nian, tanba oras nee pendente krimi nian hamutuk 263, no pendente husi prosesu sivil nian hamutuk 106.
Nia esplika, oras nee daudaun krimi neebe aas liu mak krimi violensia domestika ho forma ofensa simples nomos ho forma maustratus, tuir fali mak krimi kontra bandu.
Hatan konaba atu redus kazu pendente Juiz nee dehan, uluk iha Juiz nain ida neebe ho funsaun jenerika ba iha prosesu sivil no krimi, maibe agora numeru Juiz aumenta ona ba Juiz nain tolu, indentifika ona problema sira tribunal nian, sei kria jestor koalia hamutuk ho Juiz sira atu halo planu diak, administra ho diak liu-liu konaba ajendamentu konbina malu, hodi esforsu atu bele redus kazu pendente.
Nia reforsa tan, prosesu koletivu mak barak liu no prosesu singular menus, maibe ho numeru koletivu nee bele halao servisu ho diak liu tan.
(ter)
