DILI, STLNEWS.co – Tribunal Judisial Primeira Instansia Dili liu husi leitura akordaun, absolve arguidu nain rua ho inisial VM no FR husi krimi omisídiu agravadu.
Iha sala julgamentu laran loron Kuarta nee (05/10/2023), juiz prosesu Maria Solana deklara, iha faktus balu provadu no balu la provadu.
Provadu katak, arguidu nain rua husi arte marsiais korka, no iha duni problema balu nebee akontese iha merkadu laran. No provadu mos katak, iha problema neebe akontese. Iha duni lezadu nain rua kanek no vitima ida mate, maibe provadu mos arguidu nain rua la hatene se mak oho, tanba momentu neeba arguidu nain rua laiha fatin akontesimentu.
Juiz nee deklara, faktus neebe la provadu mak arguidu nain rua mak halo planu hodi ba ataka vitima no lezadu sira, la provadu mos katak arguidu sira mak hatudu liman ba lezadu no vitima hodi ema baku, la provadu mos aktu neebe arguidu sira halo ho intensaun.
Motivu husi faktus nee haree katak, arguidu nain rua konfesa imparsial ba faktus, arguidu nain rua laiha hotu konhesimentu konaba problema nee, no sasin sira inklui lezadu nain rua mos deklara katak, momentu akontese problema la haree arguidu nain rua iha fatin akontesimentu.
Tanba nee, juiz koletivu desidi absolve arguidu nain rua husi krimi neebe Ministeriu Publiku akuza ba, tanba konsidera faktus neebe konsta iha akuzasaun la provadu.
Audensia julgamentu nee prezidi husi Juiz Koletivu Afonso Carmona, Albertina Neves, Maria Solana, MP reprezenta husi Prokurador Ricardo Leite, arguidu hetan asistensia legal husi Advogadu Privadu.
(ter)
