DILI, STLNEWS.com – Tribunal Judisial Primera Instansia Dili, halao julgamentu ba arguidu NCS, tanba komete krimi hasoru lezada ho inisial DSL hanesan feen.
Julgamentu nee halao iha loron Sesta nee (06/05/2023), neebe prezide husi juiz singular.
Iha sala julgamentu laran arguidu deklara, momentu neeba arguidu la baku lezada ida, maibe lezada mak basa uluk arguidu no arguidu nega la tuku lezada ida.
Iha sala julgamentu, arguidu mos rekonhese, hahu husi problema nee mosu too mai agora arguidu ho lezada fahe malu ona, no arguidu mos deklara lakohi simu fali lezada hanesan nia feen.
Lezada mos deklara, arguidu uza duni liman tuku lezada, tanba momentu neeba lezada kontaktu ba arguidu la foti, tanba nee lezada tuir ba iha arguidu nia bin sira nia uma, haree arguidu iha neeba hela, ho nervozu lezada basa duni arguidu dala ida.
Lezada rekonhese katak, motivu husi problema nee tanba deit lezada kontaktu ba iha arguidu la foti. Maski mosu ona problema, lezada deklara nafatin simu arguidu hanesan nia laen, tanba sei hadomi arguidu.
Maibe haree fali arguidu nia deklarasaun katak la simu lezada, halo lezada senti tristi ho arguidu nia liafuan, maibe ho fuan boot simu realidade.
Rona tiha lezada no arguidu, iha alegasaun prokurador husu atu halo alterasaun husi krimi neebe Ministeriu Publiku (PM) akuza ba iha krimi ofensa resiproka. No defeza aseita mos ho pedidu MP nian.
Rona tiha parte rua, tribunal adia ba loron seluk hodi rona desizaun.
Audensia julgamentu nee prezide husi juiz Arjentino Nunes, MP reprezenta husi prokurador Hernani Rangel, arguidu hetan asistensia legal husi Advogadu Privadu.
(ter)
