DILI, STLNEWS.co – Durante ferias judisiariu, Defensor Publiku (DP) nain rua (2) hamutuk ho ofisial justisa balu kontinua atende kazu urjente.
“Ferias judisiariu nee, DP mos hanesan ho prokurador no tribunal sira, iha plantaun nee iha defensor nain rua, iha mos ofisial nain lima,” dehan Defensor Publiku Jeral, Cansio Xavier, ba STL liu husi telefone, Kinta nee (04/08/2022).
Nia hatutan, defensor sira neebe tama iha plantaun ka turnu nee, kazu urjensia neebe iha sira atende kedan, hanesan prosesu primeiru intergatoriu, sumariu, arguidu prezu.
Iha fatin ketak, Advogadu Privadu, Miguel Asunsoa Lopez dehan, ferias judisial komesa iha loron 1 fulan Agustu too iha loron 15 fulan Setembru.
“Atendimentu ba kliente lao normal, tanba prosesu urjente sira julgamentu lao hela,” dehan nia.
Nia afirma tan, tribunal asegura prova hanesan mos iha prosesu sivil no suspende deit mak prosesu prinsipal sira, maibe ba prosesu urjente hanesan providensia kautelar ho embargo nova de obra, kontinua lao.
(ter)