DILI, STLNEWS.co – Relasiona ho ferias judisiariu durante nee, Tribunal Judisial Primeira Instansia Baukau atende prosesu urjente rua.
“Prosesu urjente neebe tama iha Tribunal Judisial Primeira Instansia Baukau nee rua, ida prosesu sivil, prosedementu kautelar embargo obra nova, no krimi abuzu seksual ida,” dehan Juiz Administrador Tribunal Baukau, Joao Ribeiro ba STL via telefone, Kuarta nee (20/09/2023).
Tuir nia, durante ferias nee juiz sira nafatin fahe malu liu husi Turnu, atu bele atende prosesu urjensia sira nee, maibe konaba prosesu normal durante ferias suspende hela, agora foin funsiona normal hahu iha loron Segunda nee.
Iha 2023 kazu krimi neebe barak liu mak krimi violensia domestika hamutuk 67, tuir fali maka krimi ofensa integridade fisika simples hamutuk 43, no krimi omisidiu neglijente hamutuk 11 no krimi sira seluk menus husi sanulu.
Iha fatin ketak, Jurista Fernando da Costa dehan, ferias nee prosesu neebe normal suspende, prosesu neebe urjente maka lao.
“Ferias durante nee prosesu neebe normal tribunal sira suspende hela, no atende deit prosesu neebe urjente,” dehan Fernando.
Nia hatutan, prosesu neebe ho natureza urjente, kuandu iha ferias tribunal kontinua atende, hanesan sumariu, arguidu prezu, nomos primeiru interogatoriu.
(ter)
