DILI, STLNEWS.co – Jurista Timor oan konsidera katak, servisu tribunal nian durante nee lao duni, maibe nia funsionamentu seidauk masimu.
“Hau hatene tribunal sira too agora nee servisu lao duni, maibe nia funsionamentu nee la masimu,” dehan Jurista Alexandre Corte Real ba STL iha tribunal, Sesta (04/08/2023).
Nia hatete, konaba servisu balu neebe seidauk funsiona, iha nia indikator neebe hatudu, iha kazu barak mak too agora nee seidauk julga.
Ezemplu kazu hanessan korupsaun barak butuk hela la julga, maski kleur ona, iha ona evidensia ba kazu sira nee.
Nia parte husu atu ba oin presiza hadia diak liu tan servisu tribunal nian, iha parte balu neebe seidauk alkansa, ba oin presiza hadia atu bele alkansa.
Iha fatin ketak, Jurista Sergio Dias Quintas dehan, ba oin presiza hadia servisu tribunal nian.
“Liu liu aumenta rekursu umanu, tanba oras nee daudaun ita haree prosesu tama iha tribunal barak liu, maibe ema neebe atu halao knaar oituan deit,” dehan nia.
Nia reforsa tan, ba oin presiza kria mos kondisaun diak ba tribunal, liu liu kria fo kondisaun diak ba tribunal sira.
(ter)
