Guarda Nain 37 Atende Kondenadu 102, Aumenta Rekursu

DILI, STLNEWS.co – Prizaun Gleno oras nee daudaun iha guarda prizional hamutuk nain 37 deit, atende kondenadu 102, tanba nee konsidera numeru seidauk sufisiente, presiza aumenta.

“Ida nee mak sai difikuldade ba guarda prizional Timor Leste agora, iha prizaun Gleno menus ba iha guarda mane nomos guarda feto, tanba ita iha guarda hamutuk 37 deit,” dehan Diretor Prizaun Gleno Cristiano Salsinha ba STL iha Dili, Segunda (29/01/2024).

Nia hatete, husi numeru neebe iha guarda feto hamutuk nain 9, iha nain 2 halao servisu iha administrasaun nian, no iha nain 7 mak apoiu sira guarda mane hodi halo atendimentu seguransa.

Servisu neebe sira halao fahe ba turma tolu, no kada turma ida iha guarda prizional nain 4 no envolve guarda feto 1. Konsidera katak numeru nee seidauk sufisiente, tanba iha guarda hamutuk nain 37 deit, bele atende kondenadu hamutuk 102.

Diretor nee husu atu governu liu husi Ministru Justisa bele iha planu atu halo rekrutamentu ba guarda prizional sira atu bele apoiu servisu iha prizaun. Tanba iha nasaun seluk guarda nain 3 tau matan ba kondenadu 1, maibe iha ita nia rain ema nain 3 guarda ida mak tau matan.

Tanba nee husu atu presiza kria planu atu halo rekrutamentu ba iha guarda prizional, hodi aumenta numeru neebe iha.

Iha fatin ketak, Jurista Timor oan Rui Guterres konsidera, ida nee sai mos problema ida, tenki buka solusaun.

“Tuir lo-loos iha prizaun ida numeru guarda prizional tenki boot, atu kontrola ema hirak neebe kumpri hela desizaun tribunal nian,” dehan nia.

Nia hatutan, iha prizaun laran kondenadu sira mai ho krimi neebe la hanesan, atu halo mudansa ba sira nia hahalok, laos deit liu husi formasaun deit, maibe liu mos husi ambiente neebe sira iha, liu-liu guarda sira neebe tau matan ba sira.

Ba oin hanoin governu liu husi ministeriu tenki buka solusaun ba kestaun nee, atu bele aumenta numeru guarda prizional nian, tanba ohin loron ita haree prizaun sira tau kondenadu barak.

(ter)

LEAVE A REPLY

Please enter your comment!
Please enter your name here