DILI, STLNEWS.co – Ministeriu Publiku iha loron Tersa nee (25/04/2022) liu husi alegasaun final, solisita ba iha tribunal koletivu atu aplika pena prizaun tinan 3 suspende tinan 3 ba arguidu Belarmino da Silva.
Tuir Prokurador Jasinto Babo katak, razaun Ministeriu Publiku husu atu aplika pena refere, tanba Ministeriu Publiku konsidera faktus neebe konsta iha akuzasaun provadu bazeia ba arguidu nia deklarasaun, katak arguidu halo duni agresaun no lori katana halo tauk lezadu Juvinal Carlos.
Enkuantu, husi parte defeza Henrique Maris aseita ho alegasaun Ministeriu Publiku nian, neebe husu tribunal atu aplika pena prizaun tinan 3 suspende tinan 3 ba arguidu.
Rona tiha alegasaun nee, tribunal adia ba loron 10 fulan Maiu tinan nee, hodi rona desizaun ikus.
Audensia julgamentu nee preside husi Juiz Koletivu Jose Gonsalves, Alvaro Maria, Arjentino Nunes, Ministeriu Publiku reprezenta husi Prokurador Jasinto Babo, arguidu hetan asitensia legal husi Defensor Publiku Henrique Mariz.
(ter)
