DILI, STLNEWS.co – Problema simples hanesan haksesuk malu rai pedasuk, rezulta bei oan rasik taa nia Avo Mane Bendito Miranda nia kakorok too hakotu vida iha Aldeia Codo, Suku Mahina-2, Postu Administrativu Lautem, Munisipiu Lautem, iha Kinta (27/07/2023) loraik, maizumenus tuku 4:48 OTL.
Liafuan nee haktuir husi Xefi Suku Mahin-2, Marcelo Duarte Cristovão ba STL liu husi telefone iha Lautem, Sesta nee (28/07/2023).
Nia dehan, familia uma laran haksesu malu rai, ikus bei oan tama, hodi taa nia Avo Bendito Miranda nia kakorok, rezulta lakon vida.
“Nia problema nee simples deit, antes nee inan aman ho inan aman haksesuk malu, too ikus nia bei oan tama hodi taa nia Avo Bendito Miranda, rezulta nia avo lakon vída”, hatete Xefi Suku nee.
Xefi Suku nee konta tuir nia kronolojia katak, kazu omisidiu nee akontese tanba hadau malu rai iha Aldeia Codo, Suku Mahina-2, iha Kinta lorokraik (27/ 7/2023), maizumenus tuku 4:48 OTL. Iha kazu taa malu nee rezulta avo mane ida nudar Membru Konsellu Suku Mahina-2 nian Bendito Miranda mate iha fatin akontesimentu.
“Momentu hau mos laiha fatin akontesimentu, depois problema mosu tiha mak ami ba, iha duni problema, tanba hadau malu rai kiik oan ida entre uma rua nee, no nain rua nee laos ema seluk, sira familia rasik deit. Ida bei oan, ida avo, ida bei oan nee mak taa nia avo, too ikus rezulta nia avo lakon vida,” nia deklara.
Iha fatin hanesan, Komunidade Suku Mahina -2 Lindo de Jesus esplika, kazu taa malu nee akontese ho nia kauza problema neebe kiik, hadau malu rai pedasuk oan, nee mak bei oan taa nia avo too mate fatin.
“Antes nee inan aman mak haksesuk malu rai, too ikus nia bei oan tama hodi taa nia avo, rezulta nia avo lakon vida”, nia esplika.
Nia hatutan, hafoin akontesimentu Polisia Eskuadra Lautem too kedan iha fatin akontesimentu, no suspeitu koopera ho autoridade seguransa, asegura nia ba sela preventiva hodi prosesu tuir dalan legal.
“Mate isin horiseik ekipa Forensik no Task Force too iha fatin, hodi koopera ho familia atu nunee lori ba prosesu autopsia, maibe tanba ami nia kultura la fo dalan. Sira kompromi malu, mate isin la konsege lori, no too oras nee mate isin iha fatin,” nia deklara.
Nia koalia, parte família matebian la autoriza atu lori mate isin ba halao prosesa autopsia, tanba kultura la fo dalan.
“Antes kazu taa malu nee akontese, vitima buti suspeitu nia kakorok, ikus mai suspeitu halai ba uma hodi foti katana, no vítima hasoru mak suspeitu taa iha parte kakorok liman karuk, ikus mai vitima mate fatin,” nia afirma.
(jen)
