Harii Tribunal 4, Tama Faze Dezenhu

DILI, STLNEWS.co – Tribunal iha ona planu atu harii tribunal 4, no oras nee daudaun tama hela iha faze preparasaun ba dezenhu.

Tuir Juiz Administrador Tribunal Judisial Primera Instansia Dili, Afonso Carmona dehan, atu harii tribunal 4, oras nee tama ona faze diskusaun konaba dezenhu nian.

Ho lei foun neebe iha konaba estatutu judisial nian, atu estabelese tan tribunal iha munisipiu 4, hanesan Baukau, Vikeque, Ermera no Maliana, dehan Carmona ba STL iha Tribunal Segunda, 05/06/2023.

Nia dehan, oras nee daudaun tama hela iha faze dezenhu nian, nee signifika katak foin iha planu atu haree estabelese tribunal nee tenki iha dezenhu neebe hanesan hotu.

Nia esplika, razaun hili munisipiu hirak nee atu estabelese tribunal, tanba haree mos ba iha munisipiu sira nee iha populasaun barak, no iha mos prosesu barak, tanba nee hili munisipiu sira nee atu estabelese tribunal.

“Oras nee daudaun sei iha faze preparasaun ba dezenhu, no ida nee remata mak sei tama ba iha faze konstrusaun, maibe tuir planu neebe iha modelu konaba atu estabelese tribunal hirak nee sei ho modelu ida deit,” dehan Carmona.

Carmona akresenta, bainhira kontrusaun remata mak sei prepara rekursu umanu sira hodi ba halao knaar iha fatin refere.

(ter)

LEAVE A REPLY

Please enter your comment!
Please enter your name here