DILI, STLNEWS.co – Relasiona ho lei judisiariu foun atu kria tan tribunal iha munisipiu sira, tanba nee akademiku husu atu prepara uluk rekursu umanu.
“Prepara uluk rekursu umanu, tanba ita bele iha lei, bele iha edefisiu, maibe rekursu umanu laiha, ita labele halo buat ida,” dehan Akademiku UNTL Rafael De Jesus ba STL iha Dili, Domingu nee (07/05/2023).
Nia hatutan, ohin loron lei hotu hakerek ho lian portugues, tanba nee atu produs ema ida hetan kareira juiz tenki iha kapasidade neebe diak, liu-liu konhesimentu konaba lei sira.
Hanesan akademiku hatoo nia hanoin katak, bele harii edefisiu maibe tau uluk importansia ba rekursu umanu, liu-liu investe makaas ba iha sentru formasaun, hodi hili ema neebe iha kapasiadade diak hanesan edukador bele fahe sira nia metenek, atu produs ema neebe ho kapasidade atu halao knaar karik bele halao ho diak.
Hatan konaba haree rekursu umanu agora iha kareira juiz, nia parte apresia tanba ho numeru neebe sei kiik, maibe juiz sira mesak Timor oan deit, nee hatudu katak komesa mudansa iha area justisa nian.
Iha fatin seluk, Juiz Administrador Tribunal Judisial Primera Instansia Dili Afonso Carmona dehan, to ona tempu atu estabelese tribunal iha munisipiu sira.
“Estabelese tribunal iha munisipiu hanesan meius ida neebe diak lori justisa hakbesik ba povu,” dehan nia.
Juiz nee hatutan, ohin loron liu husi julgamentu movel ba iha munisipiu sira, maibe ida nee seidauk sufisiente, maibe ho estabelese tribunal iha munisipiu sira, ida nee diak liu, atu prosesu neebe tama julga deit iha fatin neebe tribunal estabelese ba.
Tuir Carmona, ohin loron prosesu barak mak tama iha tribunal, hanesan iha tribunal Judisial Dili nian kobre ba iha Ermera, Likisa, Aileu, Dili no Atauru, iha prosesu barak mak tama. Tanba nee, se estabelese tribunal iha munisipiu sira, hanoin ida nee hanesan parte ida atu lori justisa hakbesik liu tan ba povu.
(ter)
