DILI, STLNEWS.co – Relasiona ho kazu neebe akontese ba vitima Henrique Maia mate, tribunal desidi hodi kontinua rona sasin Reitor UNPAZ.
Iha julgamentu kontinuasaun neebe halao iha loron Segunda (24/04/2023), tribunal liu husi juiz koletivu, Alvaro Maria, Jose Gonsalves, Arjentino Nunes, Prokurador Matias Soares no Advogadu Privadu desidi hodi rona sasin Reitor UNPAZ, Adolmando Soares Amaral.
Iha sala julgamentu laran sasin deklara, momentu neeba sasin iha hela nia uma iha oras tuku 01:00 kalan boot, estudante Joaninho mak kontaktu ba sasin hodi fo hatene katak, estudante ida monu tun husi andar mai no mate fatin kedan.
Sasin afirma, rona ida nee sasin ba kedan iha fatin akontesimentu, bainhira sasin too iha neeba, vitima polisia sira foti tiha ona. Tanba nee, sasin kontinua nafatin iha kampus UNPAZ hodi halibur estudante sira no hein too loron mak sasin sira lori estudante sira neebe halao hela estajiu ba iha eskuadra polisia Kaikoli, hodi presta deklarasaun.
No sasin mos rekonhese, konaba prosesu nee sira entrega tomak ba iha parte seguransa mak halo investigasaun, tanba nee iha universidade la halo investigasaun interna.
Konaba arguidu sira neebe oras nee daudaun tama hela iha prizaun preventiva, sasin la konhese sira.
Rona tiha sasin nee, tribunal adia ba loron seluk hodi rona tan sasin sira seluk.
(ter)
