DILI, STLNEWS.co – Violensia hahalok ida neebe la diak, tanba nee akademiku husu inan sira neebe sofre violensia, labele tauk atu hatoo keixa.
“Ohin loron violensia barak mak akontese ba inan sira, tanba iha inan balu barani hatoo keixa, maibe balu la barani, tanba nee hau husu inan sira tenki hatoo keixa bainhira hetan violensia,” dehan Akademiku Universidade Nasional Timor Lorosae (UNTL), Sebastiao Soares ba STL, iha TDD, Tersa nee (02/08/2022).
Nia hatutan, hatoo keixa mak dalan diak liu atu halo prevensaun ba hahalok nee, hodi labele akontese tan iha futuru.
Tanba, se tauk atu hatoo keixa, mak hahalok violentu nee kontinua akontese iha familia uma laran.
Iha fatin ketak, Jurista Sergio Dias Quintas dehan, ema balun iha konhesimentu konaba lei violensia domestika, tanba nee bainhira hetan violensia sira barani ba hatoo keixa.
“Ema neebe iha konhesimentu konaba lei nee, sira barani hatoo keixa bainhira hasoru problema,” dehan nia.
Nia afirma tan, ema balun seidauk iha konhesimentu konaba lei nee, tanba nee sira senti katak, hahalok violensia nee hanesan problema uma laran.
(ter)
