DILI, STLNEWS.co – Tribunal Distrital Dili (TDD) iha loron Kuarta nee (13/04/2022) liu husi desizaun final aplika pena prizaun tinan 2, suspende tinan 3 ba arguidu Marçal Maia Soares.
Razaun tribunal aplika pena nee, tanba tribunal konsidera faktus neebe konsta iha akuzasaun provadu hotu, katak arguidu importa sigaru la liu husi alfandega no la selu taxa ba estadu.
Juiz prosesu Ana Paula deklara, faktus neebe la provadu mak dehan, arguidu hatama beibeik sigaru ilegal.
Maibe tribunal haree katak, arguidu konfesa imparsial ba faktus, foin primeira vez ba iha tribunal, arepende ba hahalok, tanba nee tribunal desidi hodi aplika pena prizaun tinan 2 suspende tinan 3 ba arguidu.
Audensia julgamentu preside husi Juiz Koletivu Joao Ribeiro, Maria Solana, Ana Paula Fonseca, Ministeriu Publiku reprezenta husi Prokurador Aderito Tilman no arguidu sira hetan asistensia legal husi Defensor Publiku Marçal Mascarinhas.
(ter)
