DILI, STLNEWS.co – Hahu husi fulan Janeiru too mai Abril nee, KAK halo ona investigasaun ba prosesu hamutuk 65.
“Iha fulan Janeiru mai too Abril nee, KAK halo investigasaun ba prosesu, tuir dadus rejista nee hamutuk 65,” dehan Diretor Investigasaun KAK, Jose Verdial ba STL iha Farol, Tersa nee (11/04/2023).
Nia katak, husi prosesu sira nee kompostu husi prosesu 48 neebe pendente iha tinan 2022 neebe la konsege termina iha tinan 2022, kontinua halo fali investigasaun iha tinan 2023 nee.
Nia esplika, iha Janeiru nee aumenta tan delegasaun kompetensia husi Ministeriu Publiku (MP) mai iha Komisaun Anti Koorupsaun (KAK) ba prosesu 17, no prosesu neebe rejista hamutuk 65.
Nunee kazu 14 nee domina ho krimi partisipasaun ekonomia i negosiu, no tuir kedan pekulatu de uzu.
Iha fatin hanesan, Akademiku Universidade Nasional Timor Lorosae (UNTL), Baltazar Martins dehan, KAK nia servisu importante tebes, tanba bele halo investigasaun ba prosesu balu neebe komplikadu.
“Hau hanoin apresia ba KAK nia servisu, tanba bele halo investigasaun ba prosesu sira nee, no hein iha futuru bele konklui mos prosesu roo Haksolok neebe sai preokupasaun ema hotu nian,” dehan Jose.
Akademiku nee dehan, husu atu parte sira nomeia lalais komisariu ida atu KAK hodi bele halo investigasaun klean ba prosesu sira neebe tama ona iha KAK nian liman.
(dom)
