DILI, STLNEWS.co – Fulan Janeiru too mai Julhu tinan nee, advogadu sira husi Advokasia Tomazia&Aloe (T&A) atende kazu barak liu mak violensia domestika ho forma ofensa integridade fisika simples no krimi violasaun seksual.
“Durante fulan Janeiru too Julhu nee ami nia Advokasia T&A atende kazu barak liu mak krimi ofensas integridade Fisika simples junta ho violensia domestika,” dehan Advogada Privada, Tomazia Umbelina, ba STL iha TDD, Tersa nee (02/08/2022).
Nia hatutan, iha kazu nee barak liu mak halo tentativa konsilisaun, lezada ho arguidu dame malu fali, kazu violensia domestika barak liu arguidu hetan pena suspensaun no balu pena multa.
Advogada nee dehan, tuir fali krimi pekulatu, kontrabandu, administrasaun danoza, kazu hirak nee marka ona data julgamentu ba iha fulan Setembru.
Nia esplika tan, iha kazu balun mak arguidu sira tama prizaun, husi defeza rekore ba tribunal aas liu mak hanesan Tribunal Rekursu.
Nunee, kazu balun hanesan kazu omesidiu agravadu ho armas branka, kliente sira hetan pena prizaun tinan 8, maibe parte defeza halo rekursu, kliente sira lakohi, tamba sira konsidera desizaun neebe tribunal hatun justu ona ba sira.
(ter)