Juiz 35, Prosesu Barak Liu

DILI, STLNEWS.co – Numeru ba iha juiz sira neebe halao knaar iha tribunal 5 hamutuk 35, maibe prosesu neebe tama iha tribunal barak liu juiz sira.

“Ita iha numeru juiz hamutuk 35, ho numeru neebe iha aloka ba iha tribunal 5 hodi halao knaar,” dehan Prezidente Asosiasaun Majislatura Judisial Timor Leste, Antonino Gonsalves ba STL iha Kaikoli, Kuarta nee (24/05/2023).

Nia sublina, juiz ho numeru ida nee deit fahe ba iha Tribunal Rekursu, tribunal judisial sira, maibe prosesu neebe tama iha tribunal barak liu.

Antonino dehan, ohin loron prosesu tama iha tribunal barak liu, too balu hanesan prosesu koletivu parte sira atu desidi loron julgamentu, tenki desidi loron ida neebe ketak, atu labele han malu fali ho prosesu sira neebe marka ona. Maibe prezidente nee mos tau konfiansa ba juiz sira, maski prosesu barak sira nafatin kumpri lei, hodi halo julgamentu ba prosesu sira nee tuir regra neebe iha.

Nunee tuir nia, hodi loron prosesu barak komesa tama tribunal, tanba ema iha konhesimentu ba lei, tanba nee hasoru problema sira sempre hatoo keixa, ho ida nee kada loron prosesu kontinua barak.

Antonino mos husu atu iha sentru formasaun bele kontinua fo formasaun, hodi bele produs tan formados balu ba iha kareira neebe iha.

Tuir Diretora Sentru Formasaun Juridiku no Judisiariu, Marselina Amaral katak, atu aumenta rekursu umanu, oras nee daudaun sentru formasaun kontinua fo formasaun ba formados sira.

“Ami iha sentru formasaun kontinua iha planu hodi fo formasaun, maibe presiza tempu hodi ami hakarak ema neebe sai husi sentru formasaun tenki ho kalidade, kapasidade neebe diak,” dehan nia.

Marcelina afirma, atu produs ema ida hodi tur iha kareira ida la fasil, tanba nia asumi ona knaar mak sei hasoru buat barak, tanba iha sentru formasaun tenki ho rigorozu produs ema neebe ho diak, banhira halao servisu bele halao servisu tuir regra nebee iha.

(ter)

LEAVE A REPLY

Please enter your comment!
Please enter your name here