DILI, STLNEWS.co – Julgamentu movel iha tribunal balu funsiona normal, maibe iha Tribunal Oekusi nian seidauk funsiona.
Tuir Juiz Administrador Tribunal Judisial Primera Instansia Oekusi, Arjentino Luiza Nunes katak, hahu simu tomada de pose hodi halao knaar iha Tribunal Oekusi indentifika ona katak, programa julgamentu movel sei paradu hela no durante nee seidauk lao.
“Julgamentu movel sei paradu hela, agora desizaun iha Konselhu Superior Majislatura Judisial TL, bainhira sira hatun despaisu ka diretiva ruma foin bele hahu fali,” dehan Juiz nee ba STL iha Oekusi via telefone, Segunda (17/07/2023).
Tuir Neves, nia parte rona ona hanoin balu husi Prokurador, Defensor, JSMP, nomos autoridade seguransa sira neebe iha Oekusi nian, sira fo hanoin katak julgamentu movel nee importante, tanba nee ba oin presiza realiza fali.
Nia esplika, konaba julgamentu movel la funsiona nia parte la hatene motivu husi saida, maibe ba iha tribunal laiha kestaun ida, kuandu despaisu ruma atu reativa, sira kontinua realiza julgamentu ho disponivel. Iha intervenentes balu moras todan idade avansadu labele mai too iha tribunal, labele hetan iha julgamentu movel, tanba iha regra prosesual rasik hateten ona katak, ema nia idade avansadu kondisaun saude la permite atu mai iha tribunal, obrigatoriamente tribunal tenki ba iha nia hela fatin.
Juiz nee haree katak, julgamentu movel presiza funsiona duni, tanba iha kestaun balu mak difikulta komunidade sira, hanesan kondisaun ekonomia, estrada. Tanba nee, tribunal labele lao mesak, presiza mos hetan apoiu husi parte hotu.
(ter)
