Julgamentu Movel Kontinua Lao

DILI, STLNEWS.co – Jurista sira husu atu programa julgamentu movel kontinua lao, tanba lori justisa hakbesik ba komunidade sira.

“Programa ida julgamentu movel nee diak, tanba juiz sira laos halao deit julgamentu iha nee, maibe sira mos halao julgamentu ba iha munisipiu sira,” dehan Jurista Sergio Dias Quintas ba STL iha Dili, Domingu (25/06/2023).

Tuir Sergio, ohin loron iha prosesu julgamentu balu tribunal marka tiha, maibe dala ruma parte sira mai tiha la prienxe koletivu, ho razaun balu tenki adia. Tanba nee, se julgamentu movel iha munisipiu, prosesu sira nee parte sira mai ona mak tribunal adia, tuir lo-loos tribunal buka loron atu prosesu sira hanesan nee bele realiza fali iha munisipiu.

Nia esplika, iha area juridisaun Dili nian pertense ba iha Munisipiu Likisa, Ermera, Aileu, maibe haree komunidade sira neebe hasoru prosesu se sira nia rezidensia iha suku, sira atu mai Dili ho distansia neebe dook.

Hanesan jurista, iha tribunal maski iha mudansa ba Juiz Administrador foun, maibe husu atu programa julgamentu movel kontinua lao, tanba lori justisa ba povu sira neebe durante nee hein hela.

Iha fatin ketak, Akademiku UNTL Mario Nunes dehan, too ohin loron komunidade barak seidauk senti justisa ba sira.

Ita nia haree komunidade barak seidauk senti justisa lo-loos ba sira, tanba justisa seidauk too iha area remotas sira,” dehan nia.

Tuir lo-loos tribunal sira tenki iha planu neebe diak, julgamentu labele halao deit iha postu administrativu sira, maibe tuir lo-loos iha planu atu julgamentu bele halao too iha suku.

Nunee, iha suku komunidade sira bele hateten lo-loos justisa besik ba sira, no sira bele hatene lo-loos knaar husi autores judisiariu sira nian.

Antes nee, Prezidente Tribunal Rekursu Deolindo Dos Santos afirma ona katak, tribunal liu husi juiz sira sei planu atu julgamentu movel neebe durante nee lao ona, ba oin atu kontinua lao nafatin.

Deolindo rekonhese, antes nee julgamentu movel iha munisipiu balu la lao, tanba nee konselhu sei haree fali, oinsa ho Juiz Administrador foun ba oin programa ida nee bele kontinua lao nafatin.

(ter)

LEAVE A REPLY

Please enter your comment!
Please enter your name here