DILI, STLNEWS.co – Julgamentu movel neebe halao iha area juridisaun tribunal Judisial Primera Instansia Dili nian, prosesu neebe juiz sira lori barak liu prosesu singular.
“Prosesu neebe lori barak liu prosesu singular, primeiru halo uluk indentifikasaun ba prosesu sira nee, no indentifika ona notifika ba parte sira, atu hein deit iha fatin neebe tribunal ba, atu nunee sira labele mai iha Dili,” dehan Juiz Administrador Tribunal Judisial Primera Instansia Dili Afonso Carmona, ba STL iha Dili, Domingo (23/04/2023).
Carmona reforsa, julgamentu movel importante atu halao, tanba iha prosesu balu tribunal marka tiha loron julgamentu iha Dili, maibe parte sira la marka prezensa, ho razaun dook.
Nunee tribunal proveita ho julgamentu movel, indentifika prosesu sira nee hodi marka loron julgamentu atu realiza deit iha munisipiu.
Juiz nee esplika, atu halao julgamentu movel tenki prepara antes, tanba iha julgamentu laos envolve juiz deit, maibe envolve mos husi prokurador no defensor, tanba nee marka antes hodi informa ba sira atu iha loron julgamentu sira mos bele marka prezensa.
No notifika mos parte sira atu sira labele mai Dili, hein deit iha fatin atu halao julgamentu iha neeba deit, hanesan mos parte ida fasilita lori justisa hakbesik ba komunidade sira.
Carmona dehan, julgamentu nee sempre lori pasu pozitivu, tanba prosesu balu neebe lori ba balu tribunal bele desidi kedan.
Iha fatin ketak, Jurista Sergio Dias Quintas informa, julgamentu movel sai hanesan prosesu neebe diak, maibe diak liu mak estabelese tribunal iha munispiu sira.
“Hau hanoin julgamentu movel deit la too, maibe diak liu estabelese tribunal iha munisipiu, ida nee bele redus prosesu pendente,” dehan nia.
Jurista nee rekomenda atu nafatin kria tribunal iha munisipiu sira hotu, bazeia ba lei judisiariu foun, atu nunee lori justisa hakbesik ba komunidade sira no redus mos kazu pendente.
(ter)
