DILI, STLNEWS.co – Relasiona ho planu governu nian atu halo auditoria ba iha tribunal kontas, Ministeriu Publiku inklui Komisaun Anti Korupsaun (KAK), sira nia parte preparadu ona.
“KAK nee instituisaun estadu nian, tanba nee governu iha kompetensia tomak atu halo auditoria, ou fiskalizasaun bainhira presiza,” dehan Diretor Investigasaun KAK, Jose Verdial ba STL iha Dili, Sesta (07/07/2023).
Tuir nia, hanesan ema neebe halao knaar tekniku iha KAK, preparadu bainhira iha auditoria ka fiskalizasaun ruma.
Iha fatin ketak, Jurista Sergio Dias Quintas dehan, Primeiru Ministru deklara sei halo auditoria ba iha KAK, ida nee normal.
“Hau nia hanoin laiha buat ida ke sala, Primeiru Ministru nudar dirizente masimu iha governu foun, nia presiza hatene konaba servisu KAK nian durante governu anterior,” dehan nia.
Nia hatutan, KAK nudar instituisaun estadu, nia tenki presta konta ba utilizasaun osan publiku nia perante auditoria.
Se governu nee mai ho politika ida hodi hakarak hatene konaba prestasaun servisu kualker instituisaun estadu nian, hanesan jurista haree ida nee normal.
Nia reforsa, prinsipiu husi auditoria nee tenki mai ho espiritu sinseridade no honestidade, ida seluk mak bainhira halo auditoria karik tenki nakloke ba publiku para hatene, auditoria nia finalidades lo-loos nee saida, depois de halo auditoria diak liu rezultadu nee loke ba publiku.
(ter)
